Qytaı Irannyń egemendigi men aýmaqtyq tutastyǵyna qol suǵýǵa qarsy

ASTANA. KAZINFORM – Qytaı Izraıldiń Iranǵa jasaǵan soqqysyna alańdaýshylyq bildirip, mundaı áreketterdiń saldary óte aýyr bolýy múmkin ekenin eskertti. Bul týraly juma kúni ótken brıfıng barysynda QHR Syrtqy ister mınıstrliginiń resmı ókili Lın Tszıan málimdedi.

– Qytaı Izraıldiń Iranǵa jasaǵan soqqysyna alańdaýly jáne bul áreketterdiń saldary aýyr bolýy múmkin ekenin eskertedi. Qytaı tarapy Irannyń egemendigine, qaýipsizdigine jáne aýmaqtyq tutastyǵyna qol suǵýǵa, sondaı-aq qaıshylyqtardy ýshyqtyryp, qaqtyǵystyń aýqymyn keńeıtýge úzildi-kesildi qarsy, – dep keltiredi Xinhua Qytaı SІM ókiliniń sózin.

Onyń aıtýynsha, aımaqtaǵy jaǵdaı qaıta shıelenisip otyr, bul eshbir taraptyń múddesine saı kelmeıdi.

Budan ári ol Qytaıdyń barlyq múddeli taraptardy óńirlik beıbitshilik pen turaqtylyqty qamtamasyz etýge jáne shıelenistiń odan ári ýshyǵýyna jol bermeýge shaqyratynyn atap ótti.

– Qytaı jaǵdaıdy turaqtandyrýǵa baǵyttalǵan kúsh-jigerge konstrýktıvti túrde qatysýǵa daıyn, – dedi dıplomat.

Buǵan deıin Qazaqstan Syrtqy ister mınıstrligi de óz málimdemesin jasaǵan bolatyn.