Qytaı Iran jáne Saýd Arabııasymen Ormýz buǵazyn ashý máselesin talqylap jatyr
ASTANA. KAZINFORM — Qytaı Syrtqy ister mınıstrliginiń resmı ókili Mao Nın aımaqtaǵy shıelenis saqtalǵan jaǵdaıda Beıjiń Taıaý Shyǵys elderimen dıalogty nyǵaıtýdy kózdeıtinin málimdedi. Bul týraly Kazinform agenttigi TASS-qa silteme jasap habarlady.
Onyń aıtýynsha, Qytaıdyń syrtqy ister mınıstri Van I Iran men Saýd Arabııasy ókilderimen kezdesip, Parsy shyǵanaǵyndaǵy jaǵdaı men aımaqtyq qaýipsizdik máselelerin talqylaǵan.
Taraptar halyqaralyq energetıkalyq resýrstar tasymalynyń úzdiksiz júrýi men jahandyq qaýipsizdik úshin Taıaý Shyǵystaǵy turaqtylyqtyń mańyzy zor ekenin atap ótti.
Mao Nınniń aıtýyna qaraǵanda, Qytaı Ormýz buǵazyn ashý jóninde saıası sheshim tabýǵa kúsh salyp, Iran men AQSh arasyndaǵy qaıshylyqtardy kelissózder arqyly retteýdi qoldaıdy.
Sonymen qatar ol Taıaý Shyǵysta áskerı qaqtyǵystardyń qaıta órshýine jol bermeý basty mindet ekenin jetkizdi.
Onyń sózinshe, Iran men Saýd Arabııasy Qytaı tóraǵasy Sı Tszınpınniń beıbit bastamalaryna oń baǵa berip, 2023 jylǵy eki el arasyndaǵy dıplomatııalyq qatynastardy qalpyna keltirý týraly Beıjiń kelisiminiń rýhynda dıalogty jalǵastyrýǵa daıyn ekenin bildirgen.
Eske salaıyq, buǵan deıin Iran AQSh tarapynan blokada men shabýyldar toqtaǵan jaǵdaıda Ormýz buǵazyn ashýǵa daıyn ekenin málimdegen edi.
