Qytaı Iordanııaǵa palestınalyq bosqyndarǵa arnalǵan medıtsınalyq kómek jiberdi
ASTANA. KAZINFORM — Qytaı Iordanııanyń Koroldik medıtsınalyq qyzmetine Gaza sektorynan osy elge qashyp kelgen naýqastar men jaralanǵan palestınalyqtarǵa kómek kórsetý úshin medıtsınalyq materıaldar partııasyn tapsyrdy, dep habarlaıdy Sınhýa.
Iordanııalyq derekkózderdiń málimetinshe, Qytaı medıtsınalyq jabdyqtar men shyǵys materıaldaryn jetkizgen. Olar Iordanııanyń birneshe aýrýhanasy men medıtsınalyq mekemesine bólinedi.
Kómek tapsyrý rásiminde Qytaıdyń Iordanııadaǵy elshiliginiń ýaqytsha senimdi ókili Gýn Anmın Iordanııanyń palestınalyqtarǵa qoldaý kórsetýdegi uzaq jylǵy gýmanıtarlyq rólin joǵary baǵalady. Onyń ishinde Gaza sektorynda dalalyq gospıtaldar ashý bastamasyn atap ótti.
Dıplomattyń aıtýynsha, bul jolǵy kómek Qytaıdyń palestınalyq anklavty qoldaýǵa baǵyttalǵan kúsh-jigeriniń jalǵasy boldy. Atap aıtqanda, ótken jyly azyq-túlik salynǵan 60 myń sálemdeme jóneltilgen.
Gýn Anmın Qytaı gýmanıtarlyq qaǵıdattardy ustanýdy, beıbit turǵyndardy qorǵaýdy jáne daǵdarystyń saldaryn jeńildetýge baǵyttalǵan kúsh-jigerdi qoldaýdy jalǵastyratynyn aıtty. Sonymen qatar Qytaı Palestına máselesin jan-jaqty, ádil ári uzaq merzimdi retteýdi qoldaıdy.
Iordanııa Koroldik medıtsınalyq qyzmeti bas dırektorynyń orynbasary Hatem ál-Abbadı Qytaıǵa kórsetken qoldaýy úshin alǵys bildirdi. Onyń sózinshe, berilgen kómek Gaza turǵyndarynyń qaıǵy-qasiretin jeńildetýge septigin tıgizip, Iordanııa men Qytaı arasyndaǵy berik qarym-qatynasty kórsetedi.
Ol sondaı-aq eki eldiń medıtsına jáne gýmanıtarlyq kómek salalaryndaǵy yntymaqtastyǵy odan ári jalǵasatynyna úmit bildirdi.
Buǵan deıin habarlanǵandaı, qyrkúıek aıynda Qytaı Nepalǵa gýmanıtarlyq kómektiń tórtinshi partııasyn jiberdi.
