Qytaı ınvestorlary Pavlodarda kólik dıskileri men qosalqy bólshekterin shyǵarmaq
PAVLODAR. KAZINFORM - Joba quny - 50 mlrd teńge. Óndiriste jylyna 2 mln dana ónim shyǵarylyp, 100-den astam turaqty jumys orny qurylýy múmkin.
Pavlodar oblysynyń ákimi Asaıyn Baıhanov qytaılyq Beijing Jinghanlin Mould Manufacturing Co. Ltd jáne Hua An International Investment Management LLP kompanııalarynyń ókilderimen kezdesti.
Kezdesý barysynda taraptar óńirdegi «Pavlodar» arnaıy ekonomıkalyq aımaǵynyń aýmaǵynda avtokólik ónerkásibine arnalǵan avtokólikterdiń alıýmınıı dıskileri men qosalqy bólshekterin shyǵaratyn kásiporyn salý múmkindigin talqylady.
- Jobanyń quny shamamen 50 mlrd teńgeni quraıdy. Kásiporyn qurylsa, jylyna 2 mln ónim shyǵaryp, 100-den astam adamdy jumyspen qamtıdy. Oblys ákimi Asaıyn Baıhanov qolaıly ınvestıtsııalyq ahýal qalyptastyrý - bul jumystaǵy basty basymdyq ekenin atap ótti. Ol kásiporynnyń bolashaǵyn joǵary baǵalady. «Beijing Jinghanlin Mould» kompanııasynyń quryltaıshysy jáne basshysy Taý Hýachan dóńgelek dıskilerin quıý jáne synaý tehnologııasy, júk kólikteriniń dóńgelekterine arnalǵan qalyptardy óndirý jáne eksportqa baǵdarlanǵan ónimniń artyqshylyqtary týraly baıandady. Taraptar jobany jan-jaqty talqylaýdy jalǵastyrýdy jáne ony iske asyrý jónindegi aldaǵy ýaqyttaǵy qadamdar týraly ýaǵdalasty,-dep habarlady oblys ákiminiń baspasóz qyzmetinen.
Beijing Jinghanlin Mould Manufacturing Co. Ltd - naryqtaǵy negizgi oıynshy jáne óz ónimderin Ońtústik-Shyǵys Azııaǵa, Eýropaǵa, Latyn Amerıkasyna jáne AQSh-qa jetkizetin Qytaıdaǵy eń iri kompanııalardyń biri.
Eske sala keteıik, AQSh ınvestory qazaqstandyq ІT-startapqa $1 mln kóleminde ınvestıtsııa quıdy.
