Qytaı ınvestorlary Qazaqstanda 50 myńdaı jumys ornyn ashty — Roman Sklıar

ASTANA. KAZINFORM — Premer-mınıstrdiń birinshi orynbasary Roman Sklıar «Ortalyq Azııa — Qytaı» ekinshi ındýstrııalyq-ınvestıtsııalyq yntymaqtastyq forýmynda sóz sóılep, eki aradaǵy ınvestıtsııalyq baılanystardyń betalysyna toqtaldy. 

— Eki eldiń arasynda senimge negizdelgen dıalog jolǵa qoıylǵan jáne ózara yntymaqtastyq joǵary deńgeıge shyqqan.

Dıplomatııa Ortalyq Azııa elderi men Qytaı arasyndaǵy yqpaldastyqtyń qozǵaýshy kúshi bolyp otyr. Barlyq baǵyt boıynsha yqpaldastyqty arttyrýdyń múmkindikteri orasan. Qytaı — Qazaqstan men Ortalyq Azııa elderiniń negizgi saýda jáne ınvestıtsııalyq seriktestiniń biri.

Byltyr Ortalyq Azııa aımaǵy men Qytaıdyń ózara saýda kólemi 95 mlrd dollarǵa jetti. Onyń jartysyna jýyǵy Qazaqstannyń úlesinde. Osylaısha byltyr eki aradaǵy taýar aınalymy tarıhı mándegi 44 mlrd dollarǵa jetti, — dedi Roman Sklıar.

Onyń sózinshe, aımaq naryǵynda qytaı kapıtalynyń qatysýymen 10 myńǵa jýyq kompanııa jumys istep otyr.

— Qazaqstanyń ózinde ǵana qytaılyq ınvestorlardyń qatysýymen jalpy somasy 66 mıllıard dollardan asatyn 224 joba iske asyrylyp, 50 myńǵa jýyq jumys orny ashyldy, — dedi vıtse-premer.

Eske salsaq, buǵan deıin Qazaqstan ekinshi AES salatyn konsortsıýmnyń tizginin Qytaıǵa berýge nıetti ekenin málim bolǵan edi.