Qytaı ınvestorlary Almaty oblysyndaǵy energetıkalyq jobalarǵa 4,9 mlrd dollar salmaqshy
ASTANA. KAZINFORM – Astanadaǵy «Ortalyq Azııa – Qytaı» ındýstrııalyq-ınvestıtsııalyq yntymaqtastyq forýmynda birneshe iri energetıkalyq jobany qamtıtyn memorandýmdarǵa qol qoıyldy.
Birinshi qujat — Almaty oblysynyń ákimdigi men TBEA Company Limited kompanııasy arasyndaǵy qýaty 1000 MVt bolatyn kún elektr stantsııasy men transformator shyǵaratyn zaýyt salýdy qamtıtyn iri energetıkalyq jobany iske asyrý boıynsha yntymaqtastyq týraly memorandým.
— Investor bolashaqta Alataý qalasyn senimdi jylýmen qamtamasyz etý úshin 1320 MVt qýattylyqtaǵy kómirmen jumys isteıtin jylý elektr ortalyǵyn salýdy da josparlap otyr. Jalpy ınvestıtsııa kólemi — 3,7 mıllıard dollar, — delingen «Kazakh Invest» málimetinde.
Sondaı-aq, Almaty oblysynyń ákimdigi men «Arna-Market» kompanııasy qýaty 1 GVt bolatyn akkýmýlıatorly kún elektr stantsııasyn salý jobasy boıynsha yntymaqtastyq týraly memorandýmǵa qol qoıdy. Investıtsııa kólemi — 1 mlrd dollar.
Al Shandong REETECH SmartOpto Technology Co. Ltd kompanııasy oblys ákimdigimen Talǵar aýdanynda qýaty 1170 MVt bolatyn kún fotoelektr stantsııasyn salý jobasy boıynsha yntymaqtastyq týraly memorandýmǵa qol qoıdy. Jobaǵa Qazaqstan tarabynan «Kerbulaqskoe hozıaıstvo» JShS qatysady. Investıtsııa kólemi — 600 mln dollar.
Eske salsaq, buǵan deıin Qazaqstan ekinshi AES salatyn konsortsıýmnyń tizginin Qytaıǵa berýge nıetti ekenin málim bolǵan edi.