Qytaı ınvestıtsııasyna salynatyn jel men kún elektr stansalarynyń tarıfi jarııalandy

ASTANA. KAZINFORM – Energetıka mınıstrligi Qytaı ınvestıtsııasyna 3 jel elektr, bir kún elektr stansasyn salýdy kózdeıtin kelisimniń jobasyn kópshilik talqylaýyna shyǵardy.

— Kelisim jańartylatyn energııa sektoryn damytýǵa, energetıkalyq qaýipsizdikke járdemdesýge jáne kómirqyshqyl gazy shyǵaryndylaryn azaıtýǵa baǵyttalǵan. Ol jalpy qýaty 1,5 GVt úsh jel elektr stantsııasyn jáne qýaty 0,3 GVt bir kún elektr stantsııasyn salýdy kózdeıdi. Jańa nysandardyń jalpy qýaty 1,8 GVt quraıdy. Jobalar Qaraǵandy, Túrkistan jáne Pavlodar oblystarynda iske asyrylady, — dep jazylǵan qujattyń baspasóz-relızinde.

Mınıstrlik mamandary atalǵan jobalardan mynandaı nátıjeler kútip otyr:

• Qazaqstannyń energııa balansyndaǵy JEK úlesin 2030 jylǵa qaraı 15%-ǵa deıin ulǵaıtý;

• Jyl saıynǵy negizde kómirqyshqyl gazy shyǵaryndylaryn (CO₂) azaıtý;

• Jumys oryndaryn qurý: 100-ge deıin turaqty jáne 1500-ge deıin ýaqytsha;

• Shamamen 2 mıllıard AQSh dollary kóleminde ınvestıtsııa tartý;

• Jyl saıyn 5,7 mlrd kVtsaǵ taza energııa óndirý.

Sondaı-aq, qujattarda ár stansadan 25 jyl boıy satyp alynatyn elektr qýatynyń aldyn ala tarıfi de kórsetilgen.

China Power International Holding Limited jáne China Energy Overseas Investment Co., Ltd. kompanııalary ınvestıtsııa salatyn 500 MVt-tyq úsh jel elektr stansasynan satyp alynatyn 1 KVt/saǵ elektr qýatynyń ındıkatıvti baǵasy 4,25 tsent bolyp belgilense, 300 MVt-tyq kún elektr stansasynyń aldyn ala tarıfi 1 KVt/saǵ elektr qýaty úshin 5,63 tsent bolyp belgilenbek. 

Ashyq talqylaýdan keıin osy kelisimdi ratıfıkatsııalaý týraly zań jobasy Parlament Májilisiniń qaraýyna engiziledi.

Eske salsaq, 2019 jyly «China Power International Holding Ltd» kompanııasy «Jańatas» JES-in salýǵa 130 mıllıon dollar ınvestıtsııa salǵan bolatyn.