Qytaı Intel kompanııasyna tergeý júrgizýi múmkin

ASTANA. KAZINFORM – Sıngapýrlyq «Lianhe Zaobao» basylymy Qytaıdyń álemdik chıp óndirisi salasyndaǵy jetekshi kásiporyn — Intel kompanııasyna tergeý júrgizýdi qarastyryp otyrǵanyn habarlady.

Basylymnyń jazýynsha, Qytaı bıligi AQSh-tyń Google jáne NVIDIA kompanııalaryna monopolııaǵa qarsy tergeýdi qaıta bastaý týraly sheshim qabyldaǵannan keıin, Intel-ge qatysty jańa tergeý júrgizý múmkindigin qarastyryp jatsa kerek.

Mán-jaıdy biletin tulǵalardyń biri qazirgi ýaqytta Intel-ge qatysty tergeýdiń sıpaty áli anyqtalmaǵanyn jáne onyń resmı túrde bastalýy Qytaı men AQSh arasyndaǵy qarym-qatynastyń qalaı damıtynyna baılanysty bolatynyn aıtqan. Basylymnyń atap kórsetýinshe, Qytaı tóraǵasy Sı Tszınpın men AQSh prezıdenti Donald Tramp jaqyn kúnderi telefon arqyly sóılesýi múmkin.

Qytaı Intel úshin eń iri naryq. 2024 jyly kompanııanyń Qytaıdaǵy satylymy 15,5 mıllıard dollarǵa jetip, jahandyq tabysynyń 29%-yn qurady.

Qytaıdyń Naryqty retteý jónindegi memlekettik bas basqarmasy ótken jyldyń jeltoqsan aıynda NVIDIA kompanııasyna qatysty monopolııaǵa qarsy tergeý bastalǵanyn jarııalaǵan bolatyn. 4 aqpan kúni Google-ge qatysty da dál osyndaı tergeý bastalǵany málim boldy.

Qytaılyq Tsınhýa ýnıversıtetiniń Ulttyq strategııalar ınstıtýtynyń sarapshysy Lıý Sıýı bul tergeýler Tramp úkimetiniń jańa tarıftik sharalaryna qarsy qytaı bıliginiń qysas qaıtarý maqsatyndaǵy sharalarynyń bir bóligi bolýy múmkin dep baǵalaıdy.

Alaıda, sarapshynyń pikirinshe, monopolııaǵa qarsy tergeýdi saýda kelissózderinde qural retinde paıdalaný AQSh-tyń tarıftik saıasatynan zardap shekken qytaılyq kompanııalardy qorǵaýdyń eń tıimdi joly bolmaýy múmkin. Onyń aıtýynsha, bul shıelenisti odan saıyn ýshyqtyra túsedi.

Aıta keteıik, Qytaıdyń iskerlik toptary AQSh-tyń kedendik baj salyǵyn kóterýine qarsy.