Qytaı halqynyń 95%-y bazalyq medıtsınalyq saqtandyrýmen qamtylǵan
ASTANA. KAZINFORM — 2025 jyldyń sońyndaǵy jaǵdaı boıynsha Qytaıda 1,33 mıllıardtan astam adam bazalyq medıtsınalyq saqtandyrý júıesimen qamtylǵan. Bul el halqynyń shamamen 95 paıyzyn quraıdy, dep habarlaıdy Sınhýa.
Bul týraly Qytaıdyń Memlekettik medıtsınalyq qamtamasyz etý basqarmasy jarııalaǵan resmı statıstıkalyq derekterde aıtylǵan. Málimetterge sáıkes, júıede tirkelgen adamdar sany bir jyl ishinde 4,06 mıllıonǵa artqan.
Vedomstvonyń dereginshe, 2025 jyly ulttyq bazalyq medıtsınalyq saqtandyrý júıesi aıasyndaǵy qor túsimderi, sonyń ishinde ana bolýdy saqtandyrýdy qosa eseptegende, jalpy kólemi shamamen 3,59 trıllıon ıýanǵa (shamamen 520 mlrd AQSh dollary) jetti. Al qordyń jalpy shyǵyny 3 trıllıon ıýan shamasynda bolǵan.
2025 jyly el boıynsha ambýlatorııalyq em alý úshin dárigerlerge júginý sany 7,215 mıllıard ret tirkelip, ótken jylmen salystyrǵanda 25,51 paıyzǵa artqan. Al statsıonarlyq emdeý qyzmetine júginý 278 mıllıon ret bolyp, bul kórsetkish 3,4 paıyzǵa tómendegen.
Vedomstvo málimetinshe, bazalyq medıtsınalyq saqtandyrý júıesi bosaný shyǵyndaryn azaıtýǵa da yqpal etip otyr. 2025 jyldyń sońynda Qytaıda shamamen 260 mıllıon adam ana bolýdy saqtandyrý júıesimen qamtylǵan. Bul bir jyl burynǵydan 6,66 mıllıon adamǵa kóp.
2025 jyldyń basynan bastap elde keıbir kómekshi reprodýktıvtik protsedýralar — mysaly, jumyrtqa jasýshasyn alý jáne jasandy uryqtandyrý — bazalyq medıtsınalyq saqtandyrý júıesi arqyly óteletin qyzmetterdiń qataryna engizildi. Sonymen qatar provıntsııalyq deńgeıdegi 30 óńirde bosaný kezindegi jansyzdandyrý da osy júıe arqyly qamtyla bastady.
Derekterge sáıkes, 2025 jyly bazalyq medıtsınalyq saqtandyrý júıesi 3 mıllıonnan astam kómekshi reprodýktıvtik protsedýrany qarjylandyryp, el boıynsha 1,6 mıllıonnan astam adamǵa kómek kórsetken.
Sonymen qatar, Qytaıdyń aýyldyq aımaqtarynda tabysy tómen turǵyndardyń jáne kedeılikten shyqqan azamattardyń 99 paıyzdan astamy bazalyq medıtsınalyq saqtandyrý júıesimen qamtylǵan.
Ótken jyly Qytaıdyń jańartylǵan memlekettik medıtsınalyq saqtandyrý tizimine 114 jańa dári-dármek engizilip, jalpy sany 3 253 ataýǵa jetti.
2025 jyly bılik medıtsınalyq saqtandyrý qorlary qarajatyn maqsatsyz paıdalanýdyń 34,2 mıllıard ıýan kólemindegi faktilerin anyqtaǵan. Qadaǵalaý nátıjesinde alaıaqtyq pen saqtandyrýdy teris paıdalanýǵa qatysy bar 1 626 mekeme anyqtaldy.
Tekserý barysynda dári-dármekterdi qadaǵalaý kodtary qoldanylyp, ulttyq medıtsınalyq saqtandyrý júıesine qosylǵan 124,7 myń medıtsınalyq jáne farmatsevtıkalyq mekeme tekserildi. Nátıjesinde zań talaptaryn buzǵan 39,1 myń mekemege qatysty shara qoldanyldy.
Osydan buryn Qytaı sal aýrýy kezinde qol qozǵalysyn qalpyna keltirý úshin mı ımplantyn maquldaǵany anyqtaldy.