Qytaı halyqaralyq yntymaqtastyq aıasynda AQSh-qa eki alyp panda jiberedi
ASTANA. KAZINFORM — Jaqyn arada Pınpın jáne Fýshýan esimdi alyp eki panda AQSh-qa attanady. Bul qadam alyp pandalardy qorǵaý salasyndaǵy halyqaralyq yntymaqtastyqty odan ári nyǵaıtýǵa baǵyttalǵan, dep habarlaıdy Sınhýa.
QHR tóraǵasy Sı Tszınpın bul týraly beısenbi kúni AQSh-qa memlekettik sapary aıasynda Aq úıde ótken qarsy alý rásiminde málimdedi. Onyń aıtýynsha, birneshe kúnnen keıin Pınpın men Fýshýan Atlanta haıýanattar baǵynda ornalasyp, amerıkalyq kórermenderge tanystyrylady.
Ótken jyly Qytaıdyń jabaıy tabıǵatty qorǵaý qaýymdastyǵy men Atlanta haıýanattar baǵy alyp pandalardy qorǵaý salasyndaǵy halyqaralyq yntymaqtastyq týraly kelisimge qol qoıǵan.
Kelisimge sáıkes, Qytaıdyń ońtústik-batysyndaǵy Sychýan provıntsııasynyń Chendý qalasyndaǵy alyp pandalardy zertteý jáne ósirý bazasynda tárbıelengen Pınpın atty erkek jáne Fýshýan atty urǵashy panda bambýk aıýlaryn qorǵaý jónindegi 10 jyldyq yntymaqtastyq baǵdarlamasy aıasynda AQSh-qa jiberiledi.
Eki pandaǵa barynsha qolaıly jaǵdaı jasaý úshin amerıkalyq tarap qytaılyq mamandardyń tehnıkalyq qoldaýymen olardyń volerlerin jańartyp, jańǵyrtýdan ótkizdi.
Pandalar Qytaı men AQSh arasyndaǵy dostyqtyń sımvolyna aınaldy
Qytaı men AQSh-tyń alyp pandalardy qorǵaý salasyndaǵy baılanysynyń tarıhy uzaq jyldarǵa sozylady. 1972 jylǵy sáýirde AQSh-tyń sol kezdegi prezıdenti Rıchard Nıksonnyń sol jyldyń aqpanynda Qytaıǵa jasaǵan saparynan keıin Lınlın jáne Sınsın esimdi eki panda AQSh-qa jetkizilgen.
Olardy jańbyrǵa qaramastan 8 myńnan astam amerıkalyq qarsy alǵan. Lınlın men Sınsın kópshilikke kórsetile bastaǵan alǵashqy aıda mıllıonnan astam adamdy haıýanattar baǵyna jınaǵan. Osylaısha alyp panda Qytaı men AQSh halyqtarynyń arasyndaǵy dostyqty nyǵaıtatyn mańyzdy baılanysqa aınaldy.
Qytaı men AQSh-tyń alyp pandalardy qorǵaý salasyndaǵy yntymaqtastyǵy Qytaıdyń jabaıy tabıǵatty qorǵaý baǵytyndaǵy eń uzaq ári aýqymdy halyqaralyq bastamalarynyń biri sanalady. 1994 jyly Qytaıdyń jabaıy tabıǵatty qorǵaý qaýymdastyǵy men San-Dıego haıýanattar baǵy ókilderi kelisimge qol qoıyp, alyp pandalardy qorǵaý salasyndaǵy ekijaqty yntymaqtastyqtyń negizin qalady.
Sońǵy úsh onjyldyqta taraptar pandalardyń minez-qulqy, qorektenýi, genetıkasy jáne aýrýlardyń aldyn alý sııaqty mańyzdy baǵyttar boıynsha birlesken zertteýler júrgizip, olardy kóbeıtý ádisterinde eleýli jetistikterge qol jetkizdi.
Osy yntymaqtastyqtyń nátıjesinde AQSh-taǵy pandalar 17 bóltirikti dúnıege ákelip, ósirip shyǵardy. Onyń altaýy San-Dıegoda, tórteýi Vashıngtonda, taǵy jeteýi Atlantada dúnıege kelgen.
2024 jyly Qytaı men AQSh bul saladaǵy yntymaqtastyqtyń jańa kezeńin bastap, sodan beri alyp pandalar AQSh-qa kezeń-kezeńimen jetkizilip keledi.
Sarapshylardyń pikirinshe, ekijaqty yntymaqtastyqtyń jańa kezeńi pandalar arasynda keń taralǵan aýrýlardyń aldyn alý men emdeýde, sondaı-aq ǵylymı-tehnıkalyq almasýda jańa nátıjelerge qol jetkizýge múmkindik beredi. Bul jahandyq bıoalýantúrlilikti qorǵaýǵa jáne Qytaı men AQSh halyqtary arasyndaǵy dostyqty nyǵaıtýǵa úles qospaq.
Eske salsaq, keshe QHR tóraǵasy Sı Tszınpın AQSh prezıdenti Donald Tramptyń Aq úıde Qytaı basshysynyń AQSh-qa úsh kúndik memlekettik saparyna oraı uıymdastyrǵan qarsy alý rásimine qatysty.
