Qytaı gýmanoıd robottary men jasandy ıntellektini standarttaýdy bekitti
ASTANA. KAZINFORM — Qytaı adamǵa uqsas robottar men jasandy ıntellektini qamtıtyn alǵashqy ulttyq standarttar júıesin bekitti, dep habarlaıdy Sınhýa.
Basylymnyń jazýynsha, Beıjińde ótken gýmanoıd robottar men jasandy ıntellektini (HEIS) standarttaý jónindegi jyl saıynǵy keńeste tanystyrylǵan júıe alty negizgi quramdas bólikten turady:
bazalyq ámbebaptyq;
mıǵa uqsas jáne zııatkerlik esepteýler;
aıaq-qoldar men komponentter;
daıyn mashınalar men júıeler;
qoldaný salasy;
qaýipsizdik jáne etıka.
Bul júıe Qytaı Halyq Respýblıkasynyń Ónerkásip jáne aqparattandyrý mınıstrligi janyndaǵy HEIS tehnıkalyq komıtetiniń jetekshiligimen 120-dan astam ǵylymı-zertteý mekemesi, kásiporyndar men ónerkásiptik paıdalanýshylardyń birlesýi arqyly ázirlengen.
Komıtet ókiliniń túsindirýinshe, mı jumysyna uqsas zııatkerlik esepteý standarttary jasandy ıntellektiniń «mıy men mıshyǵyna» qatysty mańyzdy tehnıkalyq talaptardy qamtıdy.
Atap aıtqanda, olar derekterdiń búkil ómirlik tsıklin, sondaı-aq modelderdi oqytý jáne engizý protsesterin retteıdi.
Qoldaný standarttary gýmanoıd robottardy ártúrli stsenarıılerde ázirleý, paıdalaný jáne tehnıkalyq qyzmet kórsetý tártibin aıqyndaıdy. Al qaýipsizdik pen etıka standarttary tehnologııalyq evolıýtsııanyń talaptaryna sáıkestikti qamtamasyz ete otyryp, ónerkásiptiń búkil ómirlik tsıklin qamtıdy.
Basylym atap ótkendeı, bul standarttaý júıesi 2025 jyly Qytaıdaǵy gýmanoıd robottar ındýstrııasy aıtarlyqtaı ósim kórsetkennen keıin qabyldandy. Salany ortalyq jáne jergilikti bılik organdary orta jáne uzaq merzimdi jospar aıasynda strategııalyq baǵyt retinde qarastyryp otyr.
QHR Ónerkásip jáne aqparattandyrý mınıstrliginiń derekterine sáıkes, ótken jyl Qytaıda gýmanoıd robottardy jappaı óndirýdiń alǵashqy jyly sanalady: 140-tan astam otandyq óndirýshi 330-dan asa túrli model shyǵarǵan.
— Jańa standarttar júıesi qarqyndy damyp kele jatqan bul sala úshin mańyzdy baǵdarǵa aınalyp, biryńǵaı tehnıkalyq talaptar men qaýipsizdik hattamalary arqyly sapaly damýǵa serpin beredi dep kútilýde, — delingen habarlamada.
Aıta ketelik Qytaıdyń gýmanoıd robottary Ortalyq Azııa naryǵyna bet alǵany týraly jazǵan edik.