Qytaı gýmanoıd robottardyń álemdik naryǵynyń 97 paıyzyn ıelendi
ASTANA. KAZINFORM — Bıylǵy birinshi jartyjyldyqta gýmanoıd robottardyń álemdik jetkiziliminiń 97 paıyzdan astamy qytaılyq kompanııalardyń úlesine tıdi, dep habarlaıdy Kazinform agenttiginiń Beıjińdegi menshikti tilshisi Global Times basylymyna silteme jasap.
Esepti kezeńde gýmanoıd robottardyń jahandyq jetkizilimi jyldyq kórsetkishpen salystyrǵanda 272 paıyzǵa ósip, 19 100 birlikke jetti. Onyń 85 paıyzdan astamy Qytaı naryǵyna tıesili.
Qytaıda 400-den astam adam tárizdi robot modeli ázirlengen. Bul álemdegi osyndaı robottardyń jalpy sanynyń jartysynan astamyn quraıdy. Tórtaıaqty robottar segmentinde qytaılyq óndirýshilerdiń úlesi álemdik satylymnyń 70 paıyzyna jýyq. Al bólshekterdi jergiliktendirý deńgeıi 90 paıyzdan asady.
— Bıyl Qytaıda 100 myńnan astam gýmanoıd robot shyǵarylýy múmkin. Al aldaǵy jyldary bul kórsetkish odan ári ósedi dep kútiledi, — dep keltiredi basylym First Seafront Fund shenchjendik qorynyń bas ekonomısi ıAn Delonnyń sózin.
Resmı statıstıkaǵa sáıkes, Qytaıdan birinshi jartyjyldyqta ónerkásiptik robottar eksportynyń kólemi 6,29 mlrd ıýandy (876 mln dollar) qurap, 141 el men óńirdi qamtydy. Hırýrgııalyq robottardyń eksporty 3,3 ese ósse, robototehnıka ónimderiniń jalpy eksporty 359 paıyzǵa artqan.
Buǵan deıin Qytaıda 100 myńnan astam gýmanoıd robot shyǵarylýy múmkin ekeni habarlanǵan bolatyn.
