Qytaı Gollıvýd fılmderin ımporttaýǵa shekteý qoıdy

ASTANA. KAZINFORM — Qytaı bıligi beısenbi kúni AQSh prezıdenti Donald Tramptyń Qytaı taýarlaryna qosymsha tarıf engizý sheshimine jaýap retinde Gollıvýd fılmderiniń elge ımportyn shekteıtinin málimdedi, dep habarlaıdy RFI radıostantsııasy.

Reuters agenttiginiń málimetinshe, sońǵy otyz jyl boıy Qytaı jylyna shamamen 10 iri amerıkalyq fılmdi elge kirgizýge ruqsat berip kelgen. Alaıda beısenbi kúni Qytaıdyń Ulttyq kıno basqarmasy Gollıvýd fılmderiniń bolashaqtaǵy ımport kóleminiń qysqaratynyn málimdedi.

Degenmen sarapshylardyń pikirinshe, onyń ekonomıkalyq áseri shekteýli bolmaq. Sebebi sońǵy jyldary Qytaıdaǵy Gollıvýd fılmderiniń kassalyq tabysy kúrt tómendegen.

Buǵan deıin Gollıvýd Qytaıdy álemdegi ekinshi iri kıno naryǵy retinde strategııalyq mańyzdy baǵyt dep qarastyryp kelgen. Alaıda sońǵy jyldary otandyq kınotýyndylar amerıkalyq fılmderden basym túsip júr. Máselen, 2025 jyly jaryq kórgen qytaılyq anımatsııalyq fılm «Nechja 2» (Nezha 2) Disney/Pixar stýdııasynyń «Inside Out 2» (Oıjumbaq 2) mýltfılminen asyp túsip, Qytaı tarıhyndaǵy eń tabysty anımatsııalyq fılm atandy.

– Qytaıdyń bul sheshimi – Tramp ákimshiligine joldanǵan sımvoldyq jaýap. Alaıda AQSh úshin bul ekonomıkalyq turǵyda aıtarlyqtaı shyǵyn ákelmeıdi, – deıdi salalyq sarapshy ári «Feeding the Dragon: Inside the Trillion Dollar Dilemma Facing Hollywood, the N.B.A. & American Business» kitabynyń avtory Krıs Fenton.

Onyń aıtýynsha, qazir Qytaı naryǵyndaǵy Gollıvýd fılmderiniń kassalyq úlesi nebári 5 paıyz. Sonymen qatar Qytaı tarapynan amerıkalyq stýdııalarǵa qaıtarylatyn tabys úlesi nebári 25 paıyz, al bul kórsetkish ózge elderde orta eseppen 50 paıyz shamasynda.

Fenton: «Bul qadam – Qytaıdyń qatań saıası ustanymyn kórsetýge arnalǵan jáne Vashıngtonnyń nazaryn aýdartýǵa baǵyttalǵan», – dep baǵalady.

Sarapshylardyń aıtýynsha, qazir Gollıvýd fılmderiniń tek 25 paıyzy ǵana Qytaı naryǵyna ene alady. Bul kórsetkish sońǵy jyldary Qytaıdyń ishki kınoındýstrııasynyń qarqyndy damýyna baılanysty tómendep keledi.

Buǵan deıin Qytaı Halyq Respýblıkasynyń Tóraǵasy Sı Tszınpın Ońtústik-Shyǵys Azııanyń úsh eline memlekettik saparmen baratynyn jazǵan bolatynbyz.