Qytaı ǵaryshta data-ortalyqtar salady
ASTANA. KAZINFORM — Beıjiń ǵylym jáne tehnıka komıteti jerden 700–800 km bıiktikte 16 ǵaryshtyq derekterdi óńdeý ortalyǵyn salýdy josparlap otyr, dep habarlaıdy Sınhýa.
Bul ǵaryshtyq keshender orbıtalyq esepteý platformalaryn, retranslıatsııalyq toraptardy jáne jerdegi basqarý júıelerin biriktirip, derekterdi óńdeý men jetkizýge arnalǵan taralǵan ınfraqurylymdy quraıdy.
Nysandardyń qurylysy 2035 jylǵa deıin aıaqtalmaq. Bolashaq ǵaryshtyq data-ortalyqtarǵa arnalǵan tájirıbelik spýtnıktiń ázirlemesi aıaqtaldy. Onyń ushyrylýy 2025 jyldyń sońyna nemese 2026 jyldyń basyna josparlanǵan.
Jobany iske asyrý úshin Beıjińdegi Astro-future ǵarysh tehnologııalary ınstıtýtynyń jetekshiligimen ınnovatsııalyq konsortsıým quryldy. Oǵan óndiristik tizbektiń 24 uıymy kirdi.
Konsortsıým ǵaryshtyq data-ortalyqtardy jasandy ıntellekt, mobıldi baılanys, jańa materıaldar jáne energetıka salasyndaǵy tehnologııalarmen ıntegratsııalaýǵa da jaýapty bolady.
Beıjiń ǵylym jáne tehnıka komıtetiniń málimdeýinshe, bul joba kommertsııalyq ǵarysh salasy men jasandy ıntellektti biriktirýdegi strategııalyq qadam bolyp, jańa tehnologııalyq tizbekterdiń qalyptasýyna jol ashady.
Buǵan deıin Qytaıdyń «Shenchjoý-22» ǵarysh kemesin ushyrǵany týraly jazǵanbyz.