Qytaı ǵaryshqa 647-shi «Chanchjen» mıssııasyn attandyrdy
ASTANA. KAZINFORM — Qytaı dúısenbi kúni eldiń soltústik-batysyndaǵy «Dýnfen» kommertsııalyq ǵaryshtyq ushyrýlar aımaǵynan «Chanchjen-12B Y1» (Long March-12B Y1) zymyran-tasyǵyshyn sátti ushyrdy, dep habarlaıdy Sınhýa.
Zymyran Beıjiń ýaqyty boıynsha saǵat 16:40–ta kókke kóterilip, kommertsııalyq ınternet qyzmetin kórsetýge arnalǵan «Tsıanfan» (Spacesail) spýtnıkter tobyn belgilengen orbıtaǵa shyǵardy. Mıssııa tolyqtaı sátti aıaqtaldy.
Bul — «Chanchjen-12B Y1» zymyranynyń alǵashqy ushyrylymy ári «Chanchjen» serııasyndaǵy zymyrandardyń 647-shi mıssııasy.
Qytaıdyń aeroǵarysh ǵylymy men tehnıkasy korporatsııasynyń (CASC) málimetinshe, «Chanchjen-12B Y1» — qaıta paıdalanýǵa bolatyn jańa býyndaǵy kommertsııalyq zymyran. Bul joly birinshi satyny qaıtarý synaǵy júrgizilmegenimen, mundaı synaq aldaǵy ýaqytta josparlanyp otyr.
Zymyran eki satyly qurylymnan turady. Onyń uzyndyǵy shamamen 72 metr, korpýs dıametri 4,37 metr, al bas bóliginiń dıametri 5,2 metr.
Birinshi satysy suıyq ottegi men kerosınmen jumys isteıtin toǵyz qozǵaltqyshpen jabdyqtalǵan. Zymyran tómengi Jer orbıtasyna shamamen 20 tonna júk shyǵara alady jáne ártúrli orbıtalyq mindetterdi oryndaýǵa beıimdelgen.
CASC ókilderiniń aıtýynsha, bul ushyrylym Qytaıdyń ınternet-spýtnıkterdiń iri toptamalaryn qalyptastyrýǵa arnalǵan kommertsııalyq zymyrandar parkin tolyqtyrǵan mańyzdy oqıǵa boldy.
Buǵan deıin Qytaıda poshta jóneltimderin suryptaýǵa robottar tartylǵanyn jazǵanbyz.
