Qytaı ǵalymdary telefondaǵy áreketterdi anyqtaıtyn tyń tásil usyndy
ASTANA. KAZINFORM – Qytaı ǵalymdary smartfonda iske qosylǵan qosymshalar men paıdalanýshynyń naqty áreketterin elektromagnıttik sáýlelený arqyly anyqtaýǵa múmkindik beretin ádis ázirledi, dep habarlaıdy SCMP.
Qytaı qoǵamdyq qaýipsizdik ýnıversıtetiniń mamandary bul tehnologııany baılanyssyz tsıfrlyq krımınalıstıka quraly retinde usynyp otyr.
Jańa ádistiń basty artyqshylyǵy – qurylǵynyń operatsııalyq júıesin buzbaı-aq qajetti derekterdi anyqtaý múmkindigi.
– Bul tehnıkalyq tásil tsıfrlyq krımınalıstıka úshin obektıvti dálelder alýǵa múmkindik beredi jáne tergeý áreketterin aıtarlyqtaı jeńildetýi múmkin, – deıdi mamandar.
Ádis smartfondaǵy qosymshalar ártúrli komponentterdi – protsessorlardy, Wi-Fi modýlderin, GPS júıesin nemese jad kontrollerlerin iske qosatynyna negizdelgen.
Júktemeniń ózgerýi energııa tutynýǵa áser etip, ár qurylǵyǵa tán tómen jıilikti elektromagnıttik sáýlelený qalyptastyrady. Keıin bul sıgnaldardy jasandy ıntellekt anyqtap, taldaıdy.
Tehnologııanyń tıimdiligi iPhone 15 Pro, Xiaomi 15 Pro jáne Oppo Reno 13 smartfondarynda synaqtan ótkizildi.
Douyin, WeChat, Baidu Maps, SMS menedjerleri, ınternet braýzerler, kamera jáne bultty saqtaý servısteri sekildi qosymshalardy anyqtaý dáldigi 99,07%-ǵa jetken.
Aıta keteıik, Qytaı 100 myńnan astam gýmanoıdty robot shyǵarady.
