Qartaıýdy baıaýlatýy múmkin: qytaı ǵalymdary 55 belsendi zatty anyqtady
ASTANA. KAZINFORM — Dástúrli qytaı shóp qospasy gıpertonııamen kúresýge jáne qantamyrlardyń qartaıýyn baıaýlatý arqyly ishki aǵzalardy zaqymdanýdan qorǵaýǵa kómektesedi, dep habarlaıdy Kazinform agenttiginiń Beıjińdegi menshikti tilshisi.
Mundaı qorytyndyǵa Qytaı medıtsına ǵylymdary akademııasynyń zertteýshileri zerthanalyq synaqtar nátıjesinde keldi.
Zertteý barysynda ǵalymdar jenshen, santsı jáne chýansıýn ósimdikterinen daıyndalǵan qaınatpanyń quramyn zerttedi. Onyń quramynan aǵzadaǵy qabyný úderisteri men jasýshalardyń qartaıýyn baqylaýǵa jaýap beretin erekshe aqýyz retseptoryna áser etetin 55 belsendi zat anyqtaldy.
Gıpertonııamen aýyratyn zerthanalyq egeýquıryqtarǵa júrgizilgen tájirıbe tórt aı boıy ekstrakt qabyldaý qan qysymyn tómendetetinin, júrek pen búırektiń zaqymdanýyn azaıtatynyn, tinderdiń fıbrozyn baıaýlatatynyn jáne mı neırondarynyń joǵalýyna jol bermeıtinin kórsetti.
Frontiers in Pharmacology jýrnalynda jarııalanǵan zertteý avtorlary alynǵan nátıjeler fıtoterapııanyń tıimdiligin rastap, preparatty klınıkalyq synaqtan ótkizýge ǵylymı negiz qalyptastyratynyn atap ótti.
Buǵan deıin Qytaıda adam ómirin 120 jasqa deıin uzartýǵa arnalǵan tabletkalar ázirlenip jatqany habarlanǵan edi.
