Qytaı ǵalymdary robot-bókendi naǵyz antılopalar tobyna qosynyna qosty

ASTANA. KAZINFORM — Qytaılyq ǵalymdar tıbet antılopasynyń túrine uqsas robot-antılopa jasap, ony naǵyz antılopalardyń qosynyna ilestirdi, dep jazdy Azertadj.

Robottyń dene pishini men júniniń túsi tiri antılopalarmen birdeı, al basyna beınekamera ornatyldy. Ǵalymdar bul tehnologııany sırek kezdesetin tuıaqtylardyń minez-qulqyn zertteý úshin qoldanǵan. 

Bastapqyda naǵyz antılopalar jańa «múshe» — robotqa qyzyǵýshylyq tanytqan. Alaıda olar robot dosynan qoryqpaǵan, biraz ýaqyttan soń ony topqa erkin qabyldaǵan. Robottyń synaqtan ótýi Tsınhaı Ho Sıl qoryǵynda júrgizildi. Bul aımaq teńiz deńgeıinen 4600 metr bıiktikte ornalasqan. Munda aýa raıy sýyq jáne ottegi az, sondyqtan adam ómirine qolaısyz. Alaıda óńir janýarlar áleminiń baılyǵy men ártúrliligimen tanymal.

Jaz mezgilinde myńdaǵan tıbet analyq antılopalary Zonag kóliniń mańyna jınalyp, tóldeıdi. Bul janýarlar óte úrkek keledi – olar tipti 500–800 metr qashyqtyqtaǵy adamdy baıqasa, qashyp ketedi. Al robot-antılopa bul janýarlarǵa tarıhta alǵash ret óte jaqyn bara aldy.

Model barynsha shynaıy kórinýi úshin ǵalymdar janýarlardyń júnin modeldeýmen aınalysatyn mamandardyń kómegine júgindi. Synaq barysynda robot jabaıy tabıǵatta 2 shaqyrym jol júrip, shuńqyrlar, eńister men batpaqtardan ótti. Ǵalymdar bul robot-antılopanyń kómegimen sırek kezdesetin janýardyń ómiri týraly biregeı málimetter alýdy josparlap otyr, dep habarlaıdy «Sınhýa».

Al Qyrǵyzstanda qaraquıryq popýlıatsııasy qalpyna keltirilip jatyr.