Qytaı ǵalymdary «boljaǵan» joıqyn jer silkinisi: Mınıstrlik jaýap berdi

ASTANA. KAZINFORM – TJM BAQ-ta, áleýmettik jelilerde Qytaı ǵalymdary «boljaǵan» joıqyn jer silkinisi týraly aqparatqa qatysty jaýap berdi. 

Tótenshe jaǵdaılar mınıstrligi dúrbeleńge negiz joq ekenin aıtty. 

Sońǵy kúnderi qazaqstandyq BAQ-ta, keıin áleýmettik jelilerde, blogtarda jáne messendjerlerde Qytaı ǵalymdary «boljaǵan» joıqyn jer silkinisi týraly aqparat belsendi túrde taratylyp jatyr. TJM Seısmologııalyq baıqaý jáne zertteý ulttyq ǵylymı ortalyǵy bul málimdemelerdiń artynda ne turǵanyn túsindirdi.

— Pekın jer silkinisi agenttiginiń Chjý Hýnbın bastaǵan ǵalymdar toby Qytaıdyń keıbir óńirlerinde ár 30-40 jylda bir ret magnıtýdasy 8-den joǵary kúshti jer silkinisteri bolatyn tsıkl týraly boljady. Osynyń negizinde tsıkl qazir bastalyp jatqan shyǵar degen boljam jasaldy. Zertteý tek Qytaıdyń aýmaqtaryna — Longmenshan jarylym aımaǵynda ornalasqan Sychýan jáne ıÝnnan provıntsııalaryna, sondaı-aq Shyǵys Gımalaıǵa qatysty. Bul óńirler Qazaqstannan myńdaǵan shaqyrym jerde ornalasqan jáne múldem basqa seısmıkalyq beldeýge jatady. Bul zertteý bizdiń elimizdiń aýmaǵymen eshqandaı baılanysy joq, — delingen habarlamada.

Endi taralǵan joramal oılarǵa keler bolsaq.

Qytaı ǵalymdary magnıtýdasy 8 baldan asatyn jer silkinisin boljaıdy.

— Bul málimdeme durys emes. Zertteý ǵylymı-gıpotetıkalyq bolyp tabylady, naqty boljam emes. Ǵalymdar belgili bir jer silkinisin boljamaıdy — olar bir geologııalyq jarylym sheńberindegi oqıǵalardyń tsıkldik sıpatyn taldaıdy. Keri oıdy rastaıtyn taqyryptar senimsiz jáne adamdy jańylystyrady, — delingen TJM habarlamasynda.

Qytaıdaǵy joıqyn jer silkinisi Qazaqstanǵa áser etetini sózsiz.

— Bul da durys emes. Tipti eń kúshti jer silkinisi de Qazaqstanǵa áser etýi múmkin bolatyndaı, zertteýde kórsetilgen óńirler bizdiń aýmaǵymyzdan tym alys ornalasqan, — delingen vedomstvo jaýabynda.

Qazaqstan Respýblıkasy TJM Seısmologııalyq baıqaý jáne zertteý ulttyq ǵylymı ortalyǵy azamattardy sabyr saqtap, dúrbeleńge túspeýge jáne buqaralyq aqparat quraldarynda, ásirese áleýmettik jelilerde taratylatyn jarııalanymdarǵa synı kózqaraspen qaraýǵa shaqyrady. 

Aıta ketelik Seısmologııalyq baqylaý jáne zertteýler ulttyq ǵylymı ortalyǵy (burynǵy seısmologııa ınstıtýty) jelide taraǵan joıqyn jer silkinisi týraly aqparatqa baılanysty málimdeme jasaǵan edi. Sondaı-aq Qazaqstanda bolǵan jer silkinisi Qyrǵyzstanda da sezilgen edi.