Qytaı ǵalymdary bedeýlikti emdeýdiń jańa tásilin tapty
ASTANA.KAZINFORM - Qytaı ǵalymdary áıelderdiń jasy ulǵaıǵan saıyn júkti bolý múmkindiginiń tómendeýiniń negizgi sebebin anyqtap, emdeý ádisin kórsetti, dep habarlaıdy Sınhýa.
Zertteýdi Nankaı ýnıversıteti bastaǵan ǵalymdar toby júrgizdi. Nátıjeler Cell Reports Medicine jýrnalynda jarııalandy.
-Biz buryn nazardan tys qalǵan rıbosomalyq dısfýnktsııa jumyrtqa sapasynyń nasharlaýynyń faktory ekenin anyqtadyq, - deıdi Nankaı ýnıversıtetiniń ǵalymy Lı Tsze.
Zertteýge sáıkes, rıbosomalyq genniń shamadan tys belsendiligi áıelderde shamamen 35 jasta bastalady. Bul qalypty aqýyz sıntezin buzady, hromosomalardyń bóliný qatelikterin týdyrady jáne embrıonnyń damýyna kedergi keltiredi.
Top rıbosomalyq translıatsııany tejeıtin rapamıtsın preparatyn tekserdi. Terapııanyń qysqa kýrsy rıbosomalyq belsendilikti tómendetip, aqýyz balansyn qalpyna keltirip, jumyrtqa sapasyn jaqsartty.
Kishigirim klınıkalyq synaqta birneshe áıel osy emdeýden keıin joǵary sapaly blastotsıstalar ala aldy. Bul júktiliktiń sátti ótýine jáne saý balalardyń dúnıege kelýine yqpal etti.
Shansı balalar aýrýhanasynyń ókili Ý Sıýıtsın nátıjeler kóńil qýantarlyq ekenin jáne jasqa baılanysty bedeýlikti túsiný men emdeýdiń jańa joldaryn ashatynyn atap ótti. Ol emdeý hattamasynyń tıimdiligin rastaý jáne jetildirý úshin aýqymdy klınıkalyq synaqtar qajet ekenin qosa aıtty.
Osyǵan deıin Qytaıdyń ómirdi 120 jylǵa deıin uzartatyn dári jasap jatqany týraly jazdyq.