Qytaı ǵalymdary Aıdan buryn belgisiz eki mıneraldy anyqtady
ASTANA. KAZINFORM — Qytaı ǵalymdary Aıdan ákelingen úlgilerden buryn ǵylymǵa belgisiz bolǵan eki mıneraldy anyqtady. Bul jańalyq Qytaıdyń 11-ǵarysh kúni aıasynda Chendý qalasynda ótken rásimde jarııalandy, dep Global Times-qa silteme jasap Anadoly jazdy.
Jańa mıneraldar Chane-5 mıssııasy arqyly jetkizilgen taý jynystary men topyraq úlgilerinen tabylǵan. Fosfatty mıneraldarǵa «magnezıochangızıt-(Y)» jáne «changızıt-(Ce)» ataýlary berildi.
Bul mıneraldar sırek jer elementteri fosfattary sanatyna jatady jáne Halyqaralyq mıneralogııalyq qaýymdastyq janyndaǵy jańa mıneraldar, nomenklatýra jáne jikteý komıssııasy tarapynan resmı túrde tirkelgen.
Atalǵan jańalyq Qytaıdyń Aıdaǵy mıneraldardy zertteýdegi ekinshi jáne úshinshi jetistigi boldy. Buǵan deıin, 2022 jyldyń qyrkúıeginde, qytaılyq ǵalymdar «changızıt-(Y)» dep atalatyn taǵy bir mıneraldy anyqtaǵan edi.
Jańa tabystardy eskere otyryp, Aıda anyqtalǵan mıneraldardyń jalpy sany segizge jetti. Buǵan deıin bul salada AQSh pen Reseı kósh bastap, alǵash bolyp Aı topyraǵynyń úlgilerin jınaǵan.
Aıta keteıik, Chane-5 mıssııasy 2020 jyldyń qarashasynda ushyrylyp, jeltoqsan aıynda Jerge 1,73 kg Aı jynystary men topyraǵyn jetkizgen.
Buǵan deıin Qytaı ǵaryshta aýrýhana salý úshin orbıtaǵa medıtsınalyq jabdyqtar jibergen bolatyn.
