Qytaı, Frantsııa, AQSh, Japonııa: otandyq sý salasy mamandary shetelde biliktiligin arttyryp jatyr

ASTANA. KAZINFORM — Bıyl mınıstrlik 1 myń sý sharýashylyǵy salasy mamanynyń biliktiligin jetildirýdi kózdep otyr. Bul týraly Sý resýrstary jáne ırrıgatsııa mınıstrligi ǵylym jáne ınnovatsııalar departamentiniń dırektory Lázzat Júsipova málim etti.

— Sý salasy mamandarynyń biliktiligin arttyrýǵa erekshe kóńil bólinip jatyr. Byltyr «Qazsýshar» respýblıkalyq memlekettik kásipornynyń 500 mamany arnaıy ortalyqta kýrstan ótti. Bıyl mınıstrlik atalǵan kórsetkishti 1000 mamanǵa jetkizýdi kózdep otyr. Bul baǵyttaǵy jumys halyqaralyq yntymaqtastyq aıasynda júzege asyrylyp jatyr, — dedi Lázzat Júsipova ortalyq kommýnıkatsııalar qyzmeti alańynda ótken baspasóz máslıhatynda.

Mınıstrlik ókiliniń málimdeýinshe, qazir qazaqstandyq sý salasy mamandary Qytaıda biliktilikti arttyrý kýrsynan ótip jatyr.

— Búginge deıin 60 maman kýrstan ótti, qazir 31 maman oqyp jatyr. Jyl sońyna deıin taǵy 30 maman biliktiligin arttyrady. Barlyq shyǵyndy Qytaı tarapy ótep jatyr. Sonymen qatar otandyq mamandar Ózbekstan, Frantsııa, AQSh, Ońtústik Koreıa men Japonııada bilimin shyńdap kelip jatyr. Bul rette keler jyly Qytaı tarapymen qoldanystaǵy baǵdarlamany jalǵastyrý boıynsha kelissóz júrgizilip jatyr, — dep tolyqtyrdy spıker.

Aıta keteıik, mınıstrliktiń málimetinshe, aýylda jumys isteıtin sý salasy mamandaryna 7,8 mln teńgege deıin járdemaqy beriledi. 

Sondaı-aq brıfıng barysynda nelikten Qazaqstan kórshi eldermen sý máselesin sheshe almaı otyr degen másele kóterildi.