Qytaı Fılıppındi Ońtústik Qytaı teńizindegi arandatýshylyq áreketterdi toqtatýǵa shaqyrdy
ASTANA. KAZINFORM – Qytaı Fılıppındi Ońtústik Qytaı teńizindegi arandatýshylyq áreketter men shıelenisti kúsheıtetin qadamdardy dereý toqtatýǵa shaqyrdy, dep habarlaıdy Sınhýa.
Qytaı jaǵalaý kúzetiniń resmı ókili Tszıan Lıýeniń málimdeýinshe, Fılıppın tarapy Qytaıdyń eskertýine qaramastan, beısenbi kúni Ońtústik Qytaı teńizindegi Jenaı rıfi mańynda turǵan fılıppındik kemege júk jetkizý úshin jabdyqtaý kemesin jibergen.
Qytaı tarapy bul áreketti Fılıppınniń buryn alǵan mindettemelerin buzýy dep baǵalap otyr.
– Qytaı jaǵalaý kúzeti zańǵa sáıkes fılıppındik jabdyqtaý kemesin baqylaýǵa alyp, daýys zoraıtqysh arqyly eskertý jasady. Fılıppın tarapynyń arandatýshylyq áreketteri men máseleni ýshyqtyrýy Ońtústik Qytaı teńizindegi taraptardyń is-qımyly týraly deklaratsııany eleýli túrde buzyp, óńirdegi beıbitshilik pen turaqtylyqqa nuqsan keltirdi, – dedi Tszıan Lıýe.
Onyń aıtýynsha, Qytaı jaǵalaý kúzeti budan ári de Nansha arhıpelagynda, sonyń ishinde Jenaı rıfi men oǵan irgeles teńiz aımaqtarynda zańǵa sáıkes quqyq qorǵaý operatsııalaryn júrgizedi.
Qytaı tarapy jaǵalaý kúzeti eldiń aýmaqtyq egemendigin, sondaı-aq teńizdegi quqyqtary men múddelerin qorǵaýdy jalǵastyratynyn málimdedi.
Aıta keteıik, AQSh-ta Qytaıdy qaýip dep sanaıtyndar azaıǵan.
