Qytaı fenol ımportyna antıdempıngtik baj salyǵyn 5 jylǵa uzartty

ASTANA. KAZINFORM — Qytaı AQSh, EO jáne Azııa elderinen ákelinetin fenolǵa baj salyǵyn saqtap qaldy, dep habarlaıdy Sınhýa.

QHR-dyń Saýda mınıstrligi 2025 jylǵy 29 tamyzdan bastap AQSh, Eýropalyq Odaq, Ońtústik Koreıa, Japonııa jáne Taılandtan ákelinetin fenol ónimine qatysty antıdempıngtik baj salyǵynyń qoldanylý merzimin taǵy bes jylǵa uzartatynyn habarlady.

Bul sheshim 2024 jyldyń qyrkúıeginde qytaılyq ónerkásip ókilderiniń ótinishi boıynsha bastalǵan, osy ónimge qatysty antıdempıngtik sharalardyń qoldanylý merzimi aıaqtalýyna baılanysty júrgizilgen tergeýdiń nátıjesinde qabyldandy.

Mınıstrlik atap ótkendeı, eger atalǵan sharalar alynyp tastalsa, bul elder tarapynan dempıng jalǵasýy nemese qaıta bastalýy múmkin. Bul óz kezeginde Qytaıdyń ónerkásiptik sektoryna eleýli nemese jańa zalal keltirýi yqtımal.

Fenol — óndiristik materıaldardy daıyndaýda keńinen qoldanylatyn mańyzdy organıkalyq hımııalyq shıkizat. Ol eritkish, reagent, dezınfektsııalyq qural retinde paıdalanylady jáne sıntetıkalyq talshyqtar, plastmassalar, dári-dármekter, pestıtsıdter, hosh ıistendirgishter, boıaǵyshtar, lak-boıaý ónimderi, sondaı-aq munaı óńdeý salasynda qoldanylady.

Osydan buryn Qytaı sırek kezdesetin metaldarǵa baqylaýdy kúsheıtetini málim boldy.