Qytaı Eýroparlamenttiń bes depýtatyna salynǵan sanktsııalardy alyp tastady

ASTANA. KAZINFORM – Qytaı bıligi Eýroparlamenttiń bes depýtaty men olardyń otbasylaryna qatysty salynǵan sanktsııalardy alyp tastaý týraly sheshim qabyldady, dep habarlaıdy TASS.

Bul Eýropa odaǵy men Qytaı arasyndaǵy parlamenttik dıalogty qaıta jandandyrýǵa jol ashady. Bul týraly Eýroparlamenttiń resmı málimdemesinde aıtyldy.

— Búgin Eýroparlament tóraǵasy Roberta Metsola EP-degi saıası fraktsııalardyń basshylaryn Qytaı bıliginiń sanktsııalardy alyp tastaý jónindegi sheshimi týraly habardar etti, — delingen qujatta.

Málimdemede bul qadam Eýropa odaǵy men Qytaı arasyndaǵy parlamenttik dıalogty qaıta bastaýǵa múmkindik beretini aıtylǵanymen, Eýroparlament Qytaımen aradaǵy kúrdeli máselelerdi elemeýge nıetti emes ekenin de atap ótti.

— Eýroparlament depýtattary endi qytaılyq áriptesterimen Eýropanyń múddeleri týraly saldarynan qoryqpaı ashyq talqylaı alady. Qytaımen qarym-qatynasymyz kúrdeli jáne kópqyrly bolyp qala beredi. Mundaı jaǵdaılarda eń tıimdi jol, ózara árekettestik pen dıalog, — dedi Roberta Metsolan.

Málimdemede sanktsııalardyń naqty qaı kúnnen bastap joıylatyny kórsetilmegen.

Qytaı 2021 jylǵy 22 naýryzda Eýroparlamenttiń bes depýtatyna jáne EP-tyń adam quqyqtary jónindegi qosalqy komıtetine sanktsııalar engizip, atalǵan depýtattardyń Qytaı aýmaǵyna kirýine tyıym salǵan bolatyn.

Bul qadamǵa jaýap retinde Eýropa odaǵy Qytaımen barlyq parlamenttik yntymaqtastyq túrin toqtatty.

Aıta ketelik AQSh Iran men Qytaı kompanııalaryna sanktsııa salǵan edi.