Qytaı EO-nyń Huawei jabdyqtaryna tyıym salýyna jaýap beretinin eskertti
ASTANA. KAZINFORM — Qytaı Eýropalyq odaq (EO) aýmaǵynda Huawei kompanııasynyń jabdyqtaryn paıdalanýǵa shekteý qoıý bastamasy ilgerilese, jaýap sharalaryn qabyldaýy múmkin ekenin málimdedi, dep habarlady Lianhe Zaobao.
Bloomberg agenttiginiń habarlaýynsha, Qytaıdyń EO-daǵy ókildigi 29 sáýir kúni Brıýsselde ótken kezdesýde Eýropalyq komıssııaǵa usynylǵan qujattaǵy keıbir tujyrymdardy alyp tastaýdy suraǵan. Atap aıtqanda, Qytaı jabdyqtaryn «kıberqaýipsizdikke qater» dep baǵalaý jáne Qytaı kompanııalaryn «joǵary táýekeldi jetkizýshiler» qataryna qosý máseleleri sóz bolǵan.
Eýrokomıssııanyń atqarýshy vıtse-prezıdenti Henna Vırkkýnen múshe elderge Huawei jáne ZTE jabdyqtaryn kezeń-kezeńimen paıdalanýdan bas tartýdy usynǵan. Sonymen qatar ol 2026 jyldyń basynda kıberqaýipsizdikti kúsheıtý maqsatynda zańnamaǵa mindetti talaptar engizýdi usyndy.
Qytaı tarapy eger bul bastama júzege assa, «teń jaýap sharalaryn» qabyldaýǵa májbúr bolatynyn atap ótti. Bul, óz kezeginde, EO-ǵa nemese eýropalyq kompanııalarǵa qatysty tekserister júrgizý jáne basqa da qarsy qadamdar jasaýdy qamtýy múmkin.
Qazirgi ýaqytta Eýropanyń birqatar elderi men Ulybrıtanııa telekommýnıkatsııa jelileriniń mańyzdy bólikterinde Huawei jabdyqtaryn paıdalanýǵa shekteý engizgen. Mundaı sheshimder kompanııanyń Qytaı úkimetimen baılanysy bolýy múmkin degen qaýippen túsindiriledi.
Degenmen, sarapshylar mundaı shekteýler telekommýnıkatsııa salasyna keri áser etýi múmkin ekenin aıtady. Olardyń pikirinshe, bul jelilik jabdyqtardyń jetkizilýin shektep, operatorlardy qymbatyraq nemese tehnologııalyq deńgeıi tómen balamalarǵa kóshýge májbúr etýi yqtımal. Huawei-den bólek, negizgi jetkizýshiler qatarynda Nokia men Ericsson bar.
Buǵan deıin EO Meta-ny áleýmettik jelilerde balalardy qorǵaý erejelerin buzdy dep aıyptaǵanyn habarlaǵan edik.
