Qytaı EO-men saýda kelissózderi qarsańynda ımportqa qatysty tergeý bastady
ASTANA. KAZINFORM – Qytaı Eýropalyq odaqtan p-nıtrotolýol ımporttaýǵa qatysty dempıngke qarsy tergeý bastady. Beıjińniń bul sheshimi EO ókilderimen josparlanǵan saýda kelissózderine birneshe kún qalǵanda belgili boldy, dep habarlaıdy Sınhýa.
Tergeýge osy saladaǵy qytaılyq kásiporyndardyń ótinishi sebep bolǵan.
Qytaı Halyq Respýblıkasynyń Saýda mınıstrliginiń málimetinshe, 2022–2025 jyldary Eýropalyq odaqtan p-nıtrotolýol jetkizý kólemi joǵary deńgeıde saqtalǵan, al osy kezeńde onyń baǵasy shamamen 60%-ǵa tómendegen.
Qytaı óndirýshileri ónimdi dempıngtik baǵamen ımporttaý jergilikti salaǵa zııan keltirdi dep esepteıdi. Mınıstrlik ótinish berýshiler usynǵan dálelder Qytaı zańnamasynyń jáne Dúnıejúzilik saýda uıymy erejeleriniń dempıngke qarsy tergeýdi bastaýǵa qoıylatyn talaptaryna sáıkes keletinin habarlady.
P-nıtrotolýol nemese 4-nıtrotolýol – boıaǵyshtar, pıgmentter, pestıtsıdter men farmatsevtıkalyq preparattar óndirýde qoldanylatyn hımııalyq zat.
Endi Qytaı bıligi ónim jetkizilimine qatysty mán-jaılardy jáne onyń jergilikti óndirýshilerge áserin zertteıdi. Saýda mınıstrligi tergeý qoldanystaǵy zańdar men normatıvtik aktilerge sáıkes júrgiziletinin, sondaı-aq barlyq múddeli taraptardyń quqyqtary qamtamasyz etiletinin málimdedi.
Jańa tergeý Qytaı men Eýropalyq odaq arasyndaǵy saýda dıalogy jandanyp jatqan kezeńde bastaldy. Taraptar ókilderiniń kelissózderi 8–9 qazanda Beıjińde ótedi dep josparlanǵan.
Buǵan deıin Qytaı Eýropalyq odaqtan ımporttalatyn shoshqa etine bes jyl merzimge dempıngke qarsy baj salyǵyn engizgen bolatyn.
