Qytaı energetıka salasyna JI engizýdi kózdep otyr
ASTANA.KAZINFORM - Qytaı energetıka salasyna jasandy ıntellekt (JI) tehnologııalaryn engizýdi jedeldetý josparyn usyndy, dep habarlaıdy Sınhýa.
Resmı qujatqa sáıkes, 2027 jylǵa qaraı elde JI -di energetıkalyq sektorǵa ıntegratsııalaýdyń ınnovatsııalyq júıesin qurý jáne alǵashqy mańyzdy tehnologııalyq serpilisterge qol jetkizý kerek.
2030 jylǵa qaraı Beıjiń ónerkásipti álemdik deńgeıge shyǵaryp, esepteý qýaty men energııamen qamtamasyz etý isin tıimdi úılestirýdi kózdep otyr. JI tehnologııalaryn elektr jelilerin basqarýda, jańartylatyn energııa kózderin jáne atom energetıkasyn damytýda qoldaný jospary da bar.
Jospar derekter almasýdy ońtaılandyrý, esepteý resýrstaryn elektr jelisimen biriktirý jáne salaǵa arnalǵan baǵdarlamalyq sheshimderde JI qoldanýdy keńeıtý sharalaryn qamtıdy.
Osy maqsattarǵa jetý úshin bılik qarjylyq qoldaýdy arttyryp, energetıka men jasandy ıntellekt salasyndaǵy bilimdi biriktiretin pánaralyq mamandardy daıarlaýdy kúsheıtýdi kózdep otyr.
Buǵan deıin Beıjiń mektepterinde jasandy ıntellekt páni engiziletini habarlanǵan bolatyn.