Qytaı elshisi: Qazaqstan men Qytaı qatynastary jańa deńgeıge kóterildi
ASTANA. KAZINFORM — Qazaqstan men Qytaı arasyndaǵy qarym-qatynastar sońǵy jyldary jańa deńgeıge kóterildi. Bul týraly Qytaıdyń Qazaqstandaǵy Tótenshe jáne Ókiletti elshisi Han Chýnlın 27 naýryz kúni Astanada ótken «2026 jylǵy Qytaıdyń eki sessııasynyń rýhy» taqyrybyndaǵy baspasóz brıfınginde aıtty.
Elshiniń aıtýynsha, sońǵy jyldary eki el arasyndaǵy joǵary deńgeıdegi baılanystar jıilep, túrli saladaǵy yntymaqtastyq turaqty túrde tereńdep keledi. Qytaı tóraǵasy Sı Tszınpınniń Qazaqstanǵa kelip, ekinshi «Ortalyq Azııa — Qytaı» sammıtine qatysýy, sondaı-aq Qazaqstan Prezıdenti Qasym-Jomart Toqaevtyń Qytaıǵa baryp, Tıantszın qalasynda ótken ShYU sammıti qatysýy — sonyń aıqyn dáleli.
Elshiniń málimetinshe, qazirgi tańda eki el arasyndaǵy taýar aınalymy 48,7 mıllıard AQSh dollaryna jetip, ótken jylmen salystyrǵanda 11 paıyzǵa artqan. Sonymen qatar, ónerkásip, taý-ken óndirisi, hımııa, logıstıka jáne ınfraqurylym salalaryndaǵy dástúrli yntymaqtastyq saqtalyp, avtokólik jasaý, zamanaýı aýyl sharýashylyǵy, jasyl energetıka jáne qurylys materıaldaryn óndirý sııaqty jańa baǵyttardaǵy ózara is-qımyl keńeıip keledi.
— Qazaqstan men Qytaı — damý jolyndaǵy senimdi seriktester. Biz bir maqsatqa umtylyp, ózara qoldaý kórsetip, birlesip alǵa jyljýymyz qajet, — dedi elshi.
Ekijaqty gýmanıtarlyq baılanystar da nyǵaıyp keledi. Bilim berý, ǵylym, sport jáne týrızm salalarynda jańa qujattarǵa qol qoıylyp, halyqtar arasyndaǵy baılanysty keńeıtýge basymdyq berilýde.
Elshiniń aıtýynsha, vızasyz rejımniń engizilýi eki el azamattarynyń ózara saparyn edáýir arttyrǵan. Sonymen qatar, ol «Qorǵas» halyqaralyq shekara mańy yntymaqtastyq ortalyǵyndaǵy táýliktik ortasha jolaýshylar aǵynynyń 30 myń adamǵa jýyqtaǵanyn atap ótti.
Elshi 2026 jyldyń Qazaqstan men Qytaı úshin erekshe mańyzǵa ıe ekenin atap ótti. Onyń aıtýynsha, Qazaqstan úshin bul — jańa Konstıtýtsııany iske asyrý jáne saıası reformalardy tereńdetý kezeńi, al Qytaı úshin — jańǵyrtýdy jedeldetip, damýdyń jańa kezeńine qadam basatyn mańyzdy ýaqyt.
— Aldaǵy kezeń Qazaqstan men Qytaı qatynastary úshin jańa múmkindikterge jol ashady, — dep atap ótti ol.
Ol eki eldiń birlesken kúsh-jigeriniń arqasynda Qazaqstan men Qytaı qarym-qatynasy odan ári nyǵaıyp, eki halyqtyń ıgiligine qyzmet etetinine, sondaı-aq óńirlik beıbitshilik pen turaqtylyqqa úles qosatynyna senim bildirdi.
Aıta keteıik, Qytaıdaǵy «eki sessııa» jyl saıyn ótkiziletin mańyzdy saıası sharalardyń biri sanalady. Ol Búkilqytaılyq halyq ókilderi jınalysy men Qytaı halyqtyq saıası konsýltatıvtik keńesiniń sessııalaryn qamtıdy. Onyń aıasynda Úkimettiń jumys esebi qaralyp, eldiń áleýmettik-ekonomıkalyq damý jospary, memlekettik bıýdjet, zań jobalary jáne ózge de mańyzdy memlekettik máseleler talqylanady.
Buǵan deıin 2026 jyldyń qańtar-aqpan aılarynda Qytaıdyń Shyńjań-Uıǵyr avtonomııalyq aýdanyndaǵy Qorǵas shekara ótkeli arqyly 54 myń kommertsııalyq avtokólik eksporttalǵanyn habarlaǵan edik.