Qytaı elshisi: BAQ yntymaqtastyǵy — Ortalyq Azııadaǵy ortaq bolashaqtyń negizi
ASTANA. KAZINFORM — 29 mamyr kúni Astanada Qytaı — Ortalyq Azııa medıa yntymaqtastyq forýmy resmı túrde ashyldy.
Forýmnyń ashylý saltanatynda Qytaıdyń Qazaqstandaǵy Tótenshe jáne Ókiletti elshisi Han Chýnlın negizgi baıandama jasap, Qytaı men Ortalyq Azııa elderi arasyndaǵy dostyqty nyǵaıtý men ortaq taǵdyr qaýymdastyǵyn qalyptastyrýda buqaralyq aqparat quraldarynyń mańyzyn atap ótti.
Elshiniń aıtýynsha, Ortalyq Azııa — Eýrazııa qurlyǵynyń kindik tusy ári «Bir beldeý, bir jol» bastamasynyń mańyzdy toraby. Búginde bul óńir álemdegi eń úlken damý áleýetine ıe aımaqtardyń biri bolyp otyr. Qytaı men Ortalyq Azııa elderi arasynda dıplomatııalyq qarym-qatynas ornaǵan 30 jyldan astam ýaqyt ishinde ekijaqty baılanystar ózara qurmet, ádilettilik pen teńdik, ózara tıimdilik qaǵıdattarymen damyp, buryn-sońdy bolmaǵan deńgeıge jetti.
Han Chýnlın Qytaı — Ortalyq Azııa yntymaqtastyq mehanızmi memleket basshylarynyń strategııalyq jetekshiligimen tabysty damyp kele jatqanyn atap ótti. Bul mehanızm «Bir beldeý, bir jol» bastamasyn óńir elderiniń ulttyq damý strategııalarymen ushtastyryp, saýda, energetıka, qaýipsizdik jáne mádenı-gýmanıtarlyq salalarda eleýli nátıjelerge qol jetkizip keledi.
Elshi BAQ-tyń qoǵamdar arasyndaǵy ózara túsinistik pen dostyqty nyǵaıtýdaǵy erekshe rólin erekshe atap ótti. Qytaı men Ortalyq Azııa medıa uıymdary uzaq jyldar boıy áriptestik qarym-qatynas ornatyp, halyqtar arasyndaǵy dostyqty baıandaıtyn shynaıy oqıǵalardy keńinen jetkizip keldi. Aldaǵy ýaqytta da aqparat quraldary beıbitshilik, yntymaqtastyq pen órkenıet únin jahanǵa taratýǵa óz úlesin qosa berýge tıis.
Sondaı-aq, ol Qytaı men Ortalyq Azııa elderiniń bir-birine senimdi kórshi, senimdi seriktes ári shynaıy dos ekenin atap ótti. Astanada ótetin Qytaı — Ortalyq Azııa ekinshi sammıti eki jaqty yntymaqtastyqty jańa beleske shyǵarady degen senim bildirdi. Osy rette, Han Chýnlın forýmǵa qatysyp otyrǵan óńirlik BAQ ókilderin Qytaı — Ortalyq Azııa yntymaqtastyǵynyń tabysty oqıǵalaryn keńinen nasıhattaýǵa shaqyrdy.
Buǵan deıin Astanada «Qytaı – Ortalyq Azııa» sammıti qarsańynda yntymaqtastyq perspektıvalary talqylanǵanyn jazdyq.