Qytaı elshisi aımaqtyq qaýipsizdiktiń úsh negizgi qaterin atady

ASTANA. KAZINFORM – Ortalyq Azııa elderi men Qytaı qaýipsizdik jáne quqyq qorǵaý salasyndaǵy yntymaqtastyqty nyǵaıtyp keledi. 

Bul týraly Astanada ótken Qytaı men Ortalyq Azııa elderi arasyndaǵy 2025 jylǵy gýmanıtarlyq almasý boıynsha memlekettik basqarý jáne dıalog jónindegi sımpozıýmda sóz sóılegen Qytaıdyń Qazaqstandaǵy Tótenshe jáne Ókiletti Elshisi Han Chýnlın málimdedi. 

Dıplomattyń aıtýynsha, bul salada yntymaqtastyq geosaıası táýekelder men transulttyq qaterlerdi qosa alǵanda syn-qaterdiń ósýi jaǵdaıynda erekshe mańyzdy bolyp otyr. 

– Qytaı túrli syn-qater aldynda Qytaı Ortalyq Azııa memleketterimen birlesip, «Qytaı-Ortalyq Azııa» mehanızmi aıasynda kópjaqty platformalardy nyǵaıtyp, qaýipsizdik salasynnndaǵy Jahandyq bastamasyn júzege asyrýǵa járdemdesýdi jáne aımaqtyq qaýipsizdik tetikterin jetildirýdi kózdep otyr, - dedi Han Chýnlın.

Ol radıkaldy aǵymdarmen birlesip kúresýdiń mańyzdylyǵyna erekshe toqtalyp, aımaqtaǵy turaqtylyqty qamtamasyz etý úshin ujymdyq kúsh-jiger qajettigin atap ótti. 

– Biz «úsh zulym kúsh» dep atalatyn lańkestik, separatızm jáne ekstremızmge qarsy birlesken kúresti kúsheıtip, aımaqtyń turaqty damýyna qoldaý kórsetip, senimdi qaýipsizdik qalqanyn birge qurýymyz kerek, - dep atap ótti dıplomat.

Sóz sońynda Han Chýnlın qıyn jahandyq kontekste birliktiń mańyzdylyǵyn eske saldy. 

– Jahandyq turaqsyzdyq jaǵdaıynda biz kópjaqty yntymaqtastyq jolyn birlesip ustanýymyz kerek, - dedi ol. 

Qytaı tarapynyń pikirinshe, ujymdyq qaýipsizdikti nyǵaıtý aımaqtaǵy strategııalyq áriptestiktiń ajyramas bóligine aınalyp otyr.