Qytaı elinde «Teńge ilý» federatsııasy ashylady

ASTANA. KAZINFORM – Qańtar aıynyń sońynda Qytaı Halyq Respýblıkasynyń Úrimshi qalasynda QR Ulttyq sport qaýymdastyǵy, «Teńge ilý» federatsııasy, «Ulttyq jáne at sporty túrleri» ortalyǵy ókilderiniń jáne Qytaı elindegi birqatar bıznes ókiliniń qatysýymen keńeıtilgen jıyn ótti.

QR Ulttyq sporty federatsııasy málim etkendeı, basqosýǵa negiz bolǵan taqyryp – qazaqtyń ulttyq sporty, «Teńge ilý» federatsııasyn aspanasty elinde ashý.

Atalǵan jıynda Halyqaralyq Teńge ilý federatsııasynyń negizin qalaýdyń alǵashqy alǵysharttary talqylandy. Túrli usynystar aıtylyp, ózekti taqyryptar qozǵaldy. Qatysýshylardyń sheshimimen, Qytaı eliniń «Teńge ilý» federatsııasy prezıdenti bolyp, belgili kásipker Jı Jıanýın usynyldy.

Óz kezeginde Jıanýın ózine artylǵan senimge alǵys bildire otyryp, teńge ilý sportyn Qytaı elinde keńinen nasıhattap, damytýǵa nıetti ekenin jetkizdi.

Jıyn sońynda elimizden barǵan ókilder, Qytaı memleketin aldaǵy qyrkúıek aıynda Astana qalasynda ótetin V Dúnıejúzilik kóshpendiler oıyndaryna resmı túrde shaqyrdy.