Qytaı elge kirý jáne shyǵý tártibine jańa erejeler engizedi
ASTANA. KAZINFORM — Qytaıda 15 qyrkúıekten bastap elge kirý jáne shyǵýdy retteýge arnalǵan jańa «Kirý jáne shyǵýdy basqarý týraly ereje» kúshine enedi. Qujat ımmıgratsııalyq baqylaýdy jetildirýge, azamattardyń quqyqtaryn qorǵaýǵa jáne ulttyq qaýipsizdikti nyǵaıtýǵa baǵyttalǵan. Bul týraly Kazinform agenttiginiń Beıjińdegi menshikti tilshisi Xinhua agenttigine silteme jasap habarlady.
Qujatqa sáıkes, vıza rásimdeý kezinde nemese shekaralyq baqylaýdan ótý barysynda jalǵan ne shyndyqqa sáıkes kelmeıtin málimet usynǵan shetel azamattaryna Qytaıǵa bir jyldan bes jylǵa deıin kirýge tyıym salynýy múmkin.
Sondaı-aq jańa erejeler eksporttyq baqylaý men tehnologııalar aınalymyna qatysty talaptardy buzyp, áreketi memlekettiń ónerkásiptik nemese tehnologııalyq qaýipsizdigine qater tóndiretin Qytaı azamattarynyń elden shyǵýyna shekteý qoıýdy kózdeıdi.
Budan bólek, Qytaı bıligi azamattardy qujat rásimdeý kezinde jáne memlekettik shekarada qaýipti óńirlerge sapar shegýdiń táýekeli týraly aldyn ala eskertip, qaýip deńgeıi eń joǵary aımaqtarǵa barýdan bas tartýǵa shaqyrady.
Jańa reglament kóshi-qon salasynda qyzmet kórsetetin uıymdarǵa qoıylatyn talaptardy da kúsheıtedi. Deldaldyq qyzmet kórsetetin agenttikter tirkelgennen keıin 15 kún ishinde ımmıgratsııalyq organdarda esepke turýǵa mindetti. Al sheteldik kompanııalarǵa Qytaı aýmaǵynda mundaı qyzmet kórsetýge tikeleı tyıym salynady.
Buǵan deıin Qazaqstannan Qytaı men Ózbekstanǵa jańa reıster ashylatynyn jazdyq.
