Qytaı elektr kólikterinde jasyryn esik tutqalaryn qoldanýǵa tyıym saldy

ASTANA. KAZINFORM — Qytaı elektr kólikterinde jasyryn esik tutqalaryn paıdalanýǵa resmı túrde tyıym saldy. Osylaısha, Qytaı mundaı dızaınnan bas tartqan álemdegi alǵashqy memleket atandy, dep habarlady Lianhe Zaobao. 

Buǵan deıin amerıkalyq elektr kólik óndirýshisi Tesla keńinen engizgen bul sheshim sońǵy jyldary birqatar ólimge ákelgen oqıǵalardan keıin halyqaralyq deńgeıde retteýshi organdardyń nazaryn aýdarǵan edi.

Qytaıdyń Ónerkásip jáne aqparattyq tehnologııalar mınıstrligi dúısenbi kúni jańa qaýipsizdik standarttaryn jarııalady. Qujatqa sáıkes, Qytaı aýmaǵynda satylatyn barlyq avtokólik mehanıkalyq túrde ashylatyn syrtqy esik tutqalarymen jabdyqtalýy tıis. Bul talap elektr kólikterinde qoldanylatyn jasyryn esik tutqalarynyń is júzinde tyıym salynýyn bildiredi.

Mınıstrliktiń málimetinshe, jańa standart 2027 jylǵy 1 qańtardan bastap kúshine enedi. Al buǵan deıin tıptik maquldaýdan ótken kólik úlgileri 2029 jylǵy qańtarǵa deıin konstrýktsııasyn jańa talaptarǵa sáıkestendirýge mindetti.

Jańa sheshimge Qytaı ishinde keń qoǵamdyq rezonans týdyrǵan birqatar jol-kólik oqıǵasy sebep boldy.

Atap aıtqanda, Xiaomi kompanııasynyń Xiaomi SU7 elektr kóligimen baılanysty eki órt oqıǵasy qoǵam nazaryn aýdardy. Tergeý materıaldaryna sáıkes, kólikterde elektr qýaty óshkennen keıin esikter ashylmaı qalǵan, saldarynan jolaýshylar óz betimen shyǵa almaǵan ári syrttan kómek kórsetý de múmkin bolmaǵan. Saldarynan adam ólimi tirkelgen.

Jańa talaptar tek Qytaı naryǵynda satylatyn kólikterge qatysty bolǵanymen, eldiń jahandyq avtomobıl ónerkásibindegi yqpaly bul sheshimniń áseri basqa óńirlerge de taralýy múmkin ekenin kórsetedi.

Máselen, AQSh-ta Tesla kólikteriniń esik júıeleri qaýipsizdik organdarynyń tekserý nysanyna aınalsa, Eýropada da retteýshi qurylymdar osyǵan uqsas talaptardy engizý múmkindigin qarastyryp jatyr.

Bloomberg agenttiginiń jazýynsha, Shanhaıda ornalasqan Automobility konsaltıngtik kompanııasynyń negizin qalaýshy Bıll Rýsso Qytaıdyń rólin bylaı dep sıpattaǵan:

— Qytaı álemdegi eń iri elektr kólik naryǵy bolýdan jańa avtokólik tehnologııalaryn retteıtin erejelerdi qalyptastyratyn elge aınalyp keledi.

Onyń aıtýynsha, Beıjiń bul baǵytta alǵash qadam jasap, óziniń aýqymdy ishki naryǵyn paıdalana otyryp, qytaılyq ári sheteldik avtokólik óndirýshiler úshin mindetti qaýipsizdik standarttaryn bekitýge múmkindik alyp otyr.

Buǵan deıin Qytaıdyń Xiaopeng Motors kompanııasy jańa býyndaǵy IRON robotyn tanystyrǵanyn habarlaǵan edik.