Qytaı eli qazaq halqyna eshqashan jamandyq jasaǵan joq - Toqaev

ASTANA. KAZINFORM – Qytaı eli qazaq halqyna eshqashan jamandyq jasaǵan joq. Bul týraly Qytaı Halyq Respýblıkasynyń Tóraǵasy Sı Tszınpınmen kelissózderden keıingi baspasózge arnalǵan málimdeme barysynda Memleket basshysy Qasym-Jomart Toqaev aıtty.

«Eń aldymen shaqyrýymdy qabyl alyp, Qazaqstanǵa memlekettik saparmen kelgeni úshin qadirli dosym Sı Tszınpınge shynaıy rızashylyǵymdy bildiremin. Osy saparyńyz qazaq-qytaı jylnamasyndaǵy aıtýly ári tarıhı oqıǵa. Oǵan qosa bul eki el arasyndaǵy yntymaqtastyqty jańa deńgeıge kóterýge degen sizdiń nıetińizdiń aıqyn kórinisi dep bilemin. Men bul ıgi umtylysty tolyqtaı qoldaımyn. Qytaı - biz úshin tatý kórshi, dostas jáne máńgilik jan-jaqty strategııalyq seriktes memleket. Bul bizdiń elderimizge ortaq qundylyqtar men ortaq ustanym dep aıtqym keledi. Onyń tarıhı tamyry tereńde jatqany sózsiz», - dedi Qazaqstan Prezıdenti.

Memleket basshysy ejelden eki eldiń halyqtary arasynda ózara qoldaý negizindegi tyǵyz saýda jáne gýmanıtarlyq baılanystar belsendi damyp kelgenin basa aıtty.

«Halyqtarymyz Uly Jibek joly bastaý alyp, tórtkúl dúnıege taralǵan kıeli jolda yntymaǵy men birligin jarastyrǵan. Tarıh qoınaýyna úńiletin bolsaq, qytaı eli qazaq halqyna eshqashan jamandyq jasaǵan joq. Eshqandaı tosqaýyldar qoıǵan emes. Járdem ǵana bergen. Bizdiń elderimiz árdaıym tyǵyz baılanysta jáne dostyq qarym-qatynasta boldy. Búgin de solaı jáne solaı bolyp qala da bermek. Men buǵan kámil senemin. Bir sózben biz osy sara joldy mindetti túrde jalǵastyramyz. Halyqtarymyzdyń arasyndaǵy san qyrly yntymaqtastyqty bekemdeı beremiz. Búgingi kelissóz nátıjesi sonyń aıqyn dáleli», - dedi Qasym-Jomart Toqaev.