Qytaı eksporty ósti: AQSh naryǵy qysqarsa da, Azııa men Afrıka baǵyty qarqyn aldy

ASTANA. KAZINFORM — AQSh-qa jetkizý kóleminiń tómendeýine qaramastan, Qytaı eksporty ósý dınamıkasyn kórsetip otyr, dep habarlaıdy Kazinform agenttiginiń menshikti tilshisi QHR-dyń Bas keden basqarmasyna silteme jasap.

Dúısenbi kúni jarııalanǵan keden málimetterine sáıkes, maýsym aıynda Qytaı eksporty ótken jyldyń osy kezeńimen salystyrǵanda 7,2%-ǵa ósti, al ımport 2,3%-ǵa artty.

Syrtqy saýda seriktesteri arasynda eń úlken ósim ASEAN elderimen (Ońtústik-Shyǵys Azııa memleketteriniń qaýymdastyǵy) saýdada tirkeldi – 9,6% (shamamen 513,4 mlrd dollar). Odan keıingi oryndarda:

• Eýropalyq Odaq – 3,5% (shamamen 395,1 mlrd dollar),

• OPOP (Bir beldeý – bir jol bastamasyna qatysýshy memleketter) – 4,7% (shamamen 1,58 trln dollar),

• Afrıka elderi – 14,4% (shamamen 165,3 mlrd dollar) ósimmen.

Sonymen birge, Qurama Shtattarmen taýar aınalymy 9,3%-ǵa azaıyp, 2,08 trln ıýandy (291,3 mlrd dollar) qurady.

Basqarma ókilderi syrtqy saýda qurylymynda oń ózgeristerdi de atap ótti: joǵary tehnologııaly ónimderdiń úlesi 9,2%-ǵa artsa, qytaılyq brendterdiń eksporttaǵy úlesi 32,4%-ǵa jetken.

Alty aılyq nátıjelerdi qorytyndylaǵan QHR Bas keden basqarsy basshysynyń orynbasary Van Lıntszıýn Qytaıdyń syrtqy saýdany turaqty damytýǵa qajetti barlyq resýrstary men múmkindikteri bar ekenin atap ótti. Ol negizgi faktorlar retinde naryq qurylymynyń ártaraptandyrylýyn, joǵary ınnovatsııalyq deńgeıdi, ónimniń básekege qabilettiligin jáne eksportqa baǵyttalǵan kásiporyndardyń ıkemdiligin atady.

Buǵan deıin Qytaı men Ortalyq Azııa elderiniń taýar aınalymy 95 mlrd dollarǵa jetkeni habarlanǵan bolatyn.

Qazaqstan arqyly Ázerbaıjanǵa transkaspıı baǵyty boıynsha Qytaıdan alǵashqy poıyz attanǵanyn jazǵan edik.