Qytaı eksporty qazan aıynda 1,1%-ǵa tómendedi

ASTANA. KAZINFORM — Qytaı eksporty qazan aıynda kútpegen jerden 1,1%-ǵa tómendedi, bul kórsetkish ekonomıster boljaǵan 3%-dyq ósimnen áldeqaıda tómen.

Qytaıdyń Bas keden basqarmasy 7 qarasha kúni jarııalaǵan málimetke sáıkes, dollarmen eseptegende, qazan aıynda eksport kólemi ótken jyldyń sáıkes kezeńimen salystyrǵanda 1,1%-ǵa azaıǵan. Qyrkúıek aıynda Qytaı eksporty 8,3%-ǵa óskenin eske alsaq, aıyrmashylyqtyń aıtarlyqtaı ekenine kóz jetedi. Sondaı-aq Reuters saýalnamasyna qatysqan ekonomısterdiń qazan aıynda eksport 3%-ǵa ósedi degen boljamy da aqtalmady. 

Sonymen qatar, qazan aıynda ımport kólemi sáıkes kezeńmen salystyrǵanda 1%-ǵa artqan. Bul kórsetkish te sarapshylar boljaǵan mejeden (3,2%) jáne qyrkúıektegi 7,4%-dyq ósimnen áldeqaıda tómen. 

Sıngapýrlyq Lianhe Zaobao basylymynyń jazýynsha, ótken aıda Qytaı ekonomıkasynyń ósimi aıtarlyqtaı baıaýlaǵan. Resmı málimetterge sáıkes, óndiris sektoryndaǵy satyp alý menedjerleri ındeksi (PMI) qyrkúıekte sońǵy alty aıdaǵy eń tómen deńgeıge quldyraǵan. Bul qysqa merzimde jahandyq naryqtyń Qytaı taýarlaryna suranysy shekteýli ekenin bildiredi.

Basylymnyń aıtýynsha, kóptegen zaýyt ıeleri eksporttyq tapsyrystardyń kúrt azaıǵanyn habarlaǵan.

Qazan aıynyń basynda Beıjiń sırek jer elementteriniń eksportyna baqylaýdy kúsheıtetinin málimdegen edi. Buǵan jaýap retinde AQSh prezıdenti Donald Tramp Qytaı taýarlaryna 100%-dyq tarıf engizetinin aıtyp, eki el arasyndaǵy saýda qaqtyǵysy qaıta órshigen bolatyn. 

Degenmen, AQSh pen Qytaı kóshbasshylary ótken aptada Ońtústik Koreıada kezdeskennen keıin, shıelenis aıtarlyqtaı báseńdedi. Taraptar 10 qarashada aıaqtalýǵa tıis kedendik jeńildikterdiń merzimin taǵy bir jylǵa uzartýǵa kelisti.

Biraq, AQSh naryǵyna jóneltiletin qytaılyq taýarlarǵa salynatyn kedendik salyqtyń ortasha deńgeıi áli de 45%-dan kem emes. Bul keıbir ekonomıster aıtyp júrgen Qytaı óndirýshileriniń paıda marjasyn azaıtatyn 35%-dyq boljamdy mejeden joǵary.

Ekonomısterdiń Boljaýynsha, AQSh naryǵyndaǵy úlesinen qaǵylý Qytaı eksportynyń ósimin shamamen 2 paıyzdyq tarmaqqa tejep otyr. Bul Qytaıdyń ishki jalpy ónimine (JІÓ) shamamen 0,3% shyǵyn ákeledi. 

Buǵan deıin Qytaı men AQSh arasyndaǵy saýdaǵa salynǵan qosymsha baj salyǵynyń merzimi uzarǵanyn habarlaǵan edik.