Qytaı ekojúıeni saqtaý úshin ózen boıyndaǵy bógetterdi joıyp jatyr
ASTANA. KAZINFORM — Qytaı ıAntszy ózeniniń salasynda júzdegen bóget pen shaǵyn sý elektr stantsııalaryn buzdy, dep habarlaıdy Sınhýa.
ıAntszy ózeniniń joǵarǵy aǵysynyń iri salalarynyń biri — Chıshýı ózeni basseıninde qytaılyq bekire men basqa da sırek kezdesetin balyq túrleriniń mıgratsııa joldaryn qalpyna keltirý maqsatynda júzdegen bóget pen shaǵyn sý elektr stantsııalary buzyldy.
Chıshýı ózeni ıÝnnan, Gýıchjoý jáne Sychýan provıntsııalary arqyly aǵyp ótedi jáne ulttyq tabıǵı qoryq aýmaǵyna kiredi. Alaıda aldyńǵy jyldary bul aýmaqta gıdrotehnıkalyq nysandardyń jappaı salynýy bıologııalyq ártúrliliktiń azaıýyna alyp keldi. 2022 jyly qytaılyq bekire jabaıy tabıǵatta joıylyp ketken túr retinde resmı túrde tanyldy.
2020 jyly bastalǵan ekologııalyq qaıta qurý aıasynda ózen ekojúıesin qalpyna keltirýge baǵyttalǵan aýqymdy baǵdarlama júzege asyrylyp jatyr. Gýıchjoý provıntsııasy bıliginiń málimetinshe, 2024 jyldyń sońyna deıin 373 shaǵyn GES-tiń 342-si jumysyn toqtatsa, 357 bógettiń 300-i buzylǵan.
Ótken kóktemde ǵalymdar qalpyna keltirilgen ortada qytaılyq bekireniń tabıǵı jolmen ýyldyryq shashýyn alǵash ret tirkedi. Qytaı ǵylym akademııasy janyndaǵy Gıdrobıologııa ınstıtýtynyń málimetinshe, sońǵy derekter Chıshýı ózeni basseıninde sırek kezdesetin balyqtardyń mekendeıtin ortasy men kóbeıý jaǵdaılarynyń qalpyna kele bastaǵanyn kórsetip otyr.
Ekojúıeni jaqsartý jumystaryna bógetterdi joıýmen qatar, sý almasýyn qalpyna keltirý, ekologııalyq aǵyndy qamtamasyz etý jáne negizgi arnanyń salalarmen baılanysyn kúsheıtý sharalary da kirdi. Eń úlken qıyndyq — balyqtardyń mıgratsııalyq joldaryn bosatý bolǵan.
Sońǵy monıtorıng derekterine sáıkes, Chıshýı ózeni basseınindegi bıologııalyq ártúrlilik turaqty túrde artyp keledi. Qytaılyq bekire, azııalyq mıksotsıprın jáne ıanıýandyq tuqy sııaqty sırek túrlerdiń sany men jıiliginiń edáýir artqany tirkeldi.
Aıta keteıik, buǵan deıin biz Qazaqstanda Sý resýrstary jáne ırrıgatsııa mınıstrligi 29 gıdrotehnıkalyq nysandy tekserip jatqanyn habarlaǵan edik.