Qytaı Jeńistiń 80 jyldyǵyna baılanysty áskerı sherý ótkizedi

ASTANA, KAZINFORM – Qytaı bıligi seısenbi kúni (24 maýsym) 3 qyrkúıekte Pekınde Japonǵa qarsy soǵysta jáne álemdik fashızmge qarsy soǵysta jeńiske jetýiniń 80 jyldyǵyna arnalǵan saltanatty jıyn, sonyń ishinde Tıananmen alańynda aýqymdy áskerı sherý ótkizetinin jarııalady.

Sınhýa aqparat agenttiginiń habarlaýynsha, Qytaı Ortalyq áskerı komıssııasy Birikken jaýyngerlik bólimniń jaýyngerlik bıýro basshysynyń orynbasary, general-maıor Ý Zeke seısenbi kúngi baspasóz máslıhatynda sharanyń josparyn tanystyrdy. Ol Qytaı Tóraǵasy Sı Tszınpınniń 3 qyrkúıekte Tıananmen alańynda áskerı sherýge tóraǵalyq etetinin málimdedi. 

Ý Zekeniń aıtýynsha, sherý jaıaý ásker bólimderi, áskerı tehnıka, áýe kúshteriniń ushaqtary jáne birqatar ozyq jaýyngerlik tehnıkalardyń kórsetilimin qamtıdy.

Sınhýa habarlaýynsha, sherý barysynda «ıntellektýaldy jáne ushqyshsyz jabdyqtardy qosa alǵanda, birqatar jańa jaýyngerlik kúshter» kórsetiledi. Resmı túrde naqty qandaı ozyq qarý-jaraqtardyń kórsetiletini habarlanbaǵanymen, sherýge qatysatyn barlyq tehnıkanyń Qytaı óz kúshimen óndirgenin jáne «bolashaq soǵystarǵa» arnalǵan joǵary tehnologııaly qarý ekeni aıtyldy.

General-maıor Ý Zeke sherý taqyrybynyń «uly jeńisti eske alý jáne uly soǵys rýhyn dáripteý» ekenin atap ótti. Bul shara «Sı Tszınpın joldas basqaratyn Ortalyq partııa komıtetiniń tóńireginde búkil partııany, armııany jáne Qytaıdyń ár ultynyń halqyn tyǵyz biriktirýge shabyttandyrýdy», sondaı-aq kúshti memleket qurýdy jáne qytaı ultynyń uly órleýin júzege asyrýdy kózdeıdi. 

Qytaı tarapy qazirgi ýaqytta «tıisti elderdiń basshylaryn, burynǵy saıası qaıratkerlerdi, sheteldik elshilerdi» jáne basqalardy shaqyrýdy josparlap otyrǵanyn málimdedi, biraq qaı el basshylarynyń shaqyrylatyny týraly naqty aqparat bergen joq.

Qytaıdaǵy sońǵy aýqymdy áskerı sherý 2019 jyly eldiń qurylǵanyna 70 jyl tolýyna oraı Ulttyq mereke kúni ótkizilgen bolatyn.

Aıta keteıik, Qytaı AQSh-tyń Iranǵa jasaǵan shabýylyn qatań aıyptady.