Qytaı eki provıntsııasynda taıfýn saldaryn joıýǵa 40 mln ıýan bóldi
ASTANA. KAZINFROM — Qýatty «Bavı» taıfýny Qytaıdyń shyǵys jaǵalaýyndaǵy birqatar aýdanǵa nóser jańbyr ákelip, sý tasqyny men ózge de tótenshe jaǵdaılarǵa sebep boldy, dep habarlaıdy Sınhýa.
QHR Qarjy mınıstrligi men QHR Tótenshe jaǵdaılardy basqarý mınıstrligi birlesip, tabıǵı apattardan zardap shekkenderge kómek kórsetý jónindegi ortalyq qordan Fýtszıan jáne Chjetszıan provıntsııalaryndaǵy apattyq-qutqarý jáne qalpyna keltirý jumystaryna qoldaý kórsetý úshin 40 mln ıýan (shamamen 5,88 mln AQSh dollary) bóldi.
Qytaıdyń Sý tasqyny men qurǵaqshylyqqa qarsy kúres jónindegi memlekettik shtaby sý tasqyny men taıfýn qaýpine baılanysty Fýtszıan jáne Chjetszıan provıntsııalarynda tótenshe áreket etýdiń ekinshi deńgeıdegi rejımin engizdi.
Qarjy mınıstrliginiń málimetinshe, bólingen qarajat sý tasqynyna qarsy shuǵyl is-sharalardy júrgizýge jáne taıfýn saldaryn joıýǵa baǵyttalady.
Qarjylandyrý eń aldymen zardap shekken turǵyndardy evakýatsııalaý men ýaqytsha qonystandyrýǵa, tikeleı qaýip-qaterlerdi joıýǵa, yqtımal qaıtalama apattardyń aldyn alýǵa jáne ózge de kezek kúttirmeıtin avarııalyq-qutqarý jumystaryna jumsalady.
Bıylǵy jyldyń toǵyzynshy taıfýny sanalatyn «Bavı» jeksenbige qaraǵan túni Chjetszıan provıntsııasyndaǵy Sanmen jáne Tsannan ýezderiniń aralyǵyndaǵy jaǵalaýǵa jetedi dep kútiledi. Qurlyqqa shyqqannan keıin taıfýn soltústik-batysqa qaraı jyljyp, keıin baǵytyn soltústikke ózgertedi degen boljam bar.
Budan buryn habarlanǵandaı, Qytaıdyń ońtústigindegi Gýansı-Chjýan avtonomııalyq aýdanyndaǵy Nannın qalalyq okrýginde nóser jaýynnan keıingi sý tasqyny men birneshe sý qoımasy bógetteriniń buzylýy saldarynan eki adam qaza taýyp, shamamen 55 myń adam apat aımaǵynda qaldy.
Qytaı sý tasqynynan zardap shekken óńirine qosymsha gýmanıtarlyq kómek jibergeni aıtyldy.
