Qytaı egde jastaǵylarǵa zań kómegin keńeıtedi

ASTANA. KAZINFORM — Qytaıdyń Azamattyq ister mınıstrligi jáne Joǵarǵy halyq sotymen qosa 7 úkimettik organ qart adamdarǵa kórsetiletin zań qyzmetteriniń sapasyn arttyrý jáne olardyń quqyqtaryn qorǵaý boıynsha nusqaýlyq usynymdardy jarııalady, dep habarlaıdy Sınhýa.

Elde 60 jastan asqan adamdardyń sany 310 mıllıonnan asady. Qytaı halqynyń qartaıýyna baılanysty — bul qadam egde jastaǵy azamattarǵa qatysty týyndaıtyn daýly máselelerdi sheshýge jáne olar úshin qolaıly áleýmettik orta qalyptastyrýǵa baǵyttalǵan.

Qujattaǵy basty basymdyqtardyń biri — qarttardyń sot organdaryna kedergisiz qol jetkizýine jaǵdaı jasaý jáne kórsetiletin qyzmetterdiń sapasyn jaqsartý. Sondaı-aq qujatta aldyn ala sot isin júrgizý, úıge baryp zań qyzmetin kórsetý sııaqty arnaıy qyzmetterdi engizý kózdelgen.

Usynymdarda qarttarǵa qarsy baǵyttalǵan qylmystar úshin jazany kúsheıtý qajettigi de kórsetilgen. Olardyń qataryna alaıaqtyq, urlyq, bopsalaý, sondaı-aq kútim qyzmeti jeleýimen múliktik quqyqtaryna qol suǵý da jatady. Qujatta muragerlik daýlary, qarttarǵa kútim jasaý, qarjyny basqarý jáne densaýlyqqa qatysty taýarlar sekildi salalarda táýekelderdiń aldyn alý qajettigine erekshe mán berilgen.

Áleýmettik turǵydan álsiz toptardy qorǵaý maqsatynda, usynymdarda qart adamdardyń tabysyna baılanysty zań kómegin alýǵa qoıylatyn shekteýlerdi alyp tastaý usynylady. Bul turmystyq zorlyq-zombylyqqa, nemquraıly qaraýǵa nemese qaraýsyz qalýǵa ushyraǵan qarttarǵa qatysty.

Sondaı-aq qujatta jalǵyz turatyn, eńbekke qabiletsiz nemese dementsııaǵa shaldyqqan qart adamdarǵa kórsetiletin zań kómeginiń aýqymyn keńeıtý usynylady.

Osyǵan deıin qytaılyqtardyń 70 paıyzy salmaq tastaýdy armandaıdy, al 60 paıyzdan astamy bul maqsatqa jetý úshin ýaqyt pen kúsh jumsaýǵa daıyn ekeni anyqtaldy.