Qytaı DSU-nyń álemdik saýdadaǵy rólin kúsheıtýge shaqyrdy

BEIJІŃ. KAZINFORM – Qytaı kópjaqty saýda júıesin qoldaıdy jáne Dúnıejúzilik saýda uıymynyń (DSU) jahandyq ekonomıkalyq basqarýda mańyzdy ról atqarǵanyn qalaıdy, dep habarlaıdy Kazinform menshikti tilshisi.

Bul týraly QHR Saýda mınıstri Van Ventao DSU bas dırektory Ngozı Okondjo-Ivealamen kezdesýinde málimdedi.

QHR Kommertsııa mınıstrliginiń málimdemesinde aıtylǵandaı, Van Ventao DSU jeke músheler tarapynan tarıfterdi erikti túrde kóterý jaǵdaıynda birjaqty tarıfterge baqylaýdy kúsheıtip, tıisti múshelerdi eki jaqty saýda kelisimderin DSU erejelerine sáıkes keltirýge jáne basqa múshelerdiń múddelerine zııan keltirmeýge shaqyrý úshin obektıvti jáne beıtarap saıası usynystaryn berýi tıis ekenin atap ótti.

- Qytaı kópjaqty saýda júıesin tabandy túrde qoldaıdy jáne DSU-nyń jahandyq ekonomıkany basqarýda mańyzdyraq ról atqarýyn jaqtaıdy, - dep keltirdi QHR Kommertsııa mınıstrligi Van Ventao sózderin.

Qytaılyq sheneýnik DSU reformalaryna qatysty sózinde Qytaı daýlardy retteý mehanızminiń qalypty jumysyn tezirek qalpyna keltirýdi, konsensýs negizinde sheshim qabyldaýǵa ıkemdi, tıimdi jáne jaýapty tásilderdi zertteýdi, ınvestıtsııa men elektrondy kommertsııany jeńildetýdi, sondaı-aq saýda jáne qorshaǵan orta, jetkizý tizbeginiń turaqtylyǵy jáne jasandy ıntellıgentsııa máseleleri boıynsha pikirtalas ótkizýdi qoldaıtynyn atap ótti.

Buǵan deıin DSU «tarıf soǵysyna» baılanysty álemdik saýdanyń quldyraıtynyn boljaǵanyn jazǵan edik.