Qytaı «Dolfın» taıfýnyna baılanysty alty óńirde qaýip deńgeıin kóterdi
ASTANA. KAZINFORM – Qytaıdyń Sý resýrstary mınıstrligi bıylǵy 13-shi «Dolfın» taıfýnynyń jaqyndaýyna baılanysty provıntsııalyq deńgeıdegi alty ákimshilik aýmaqta sý tasqynyna qarsy úshinshi deńgeıli tótenshe áreket etý rejımin iske qosty, dep habarlaıdy Sınhýa.
Mınıstrliktiń málimetinshe, senbiden kelesi sársenbige deıin eldiń shyǵysyndaǵy Shanhaı qalasynda, sondaı-aq Tszıansý, Chjetszıan, Anhoı, Fýtszıan jáne Tszıansı provıntsııalarynda nóser jaýyn jaýady dep boljanyp otyr. Qatty jaýyn-shashyn saldarynan birqatar ózende sý deńgeıi kúrt kóterilýi múmkin.
Mınıstrlik jergilikti bılik organdaryna monıtorıngti kúsheıtip, ózender men sý qoımalaryndaǵy sý tasqynynyń, sondaı-aq taýly aımaqtardaǵy seldiń aldyn alý úshin sý sharýashylyǵy nysandaryn tıimdi basqarýdy tapsyrdy.
Qytaıdyń Ulttyq meteorologııalyq ortalyǵy juma kúni keshke «sary» deńgeıli eskertý jarııalady. Boljam boıynsha, «Dolfın» jeksenbi men dúısenbi aralyǵynda Qytaıdyń shyǵys jaǵalaýyna – Chjetszıan provıntsııasyna nemese Fýtszıan provıntsııasynyń soltústigine jetýi múmkin.
Ulttyq meteorologııalyq ortalyqtyń bas sınoptıgi Sıýı Inlýnnyń aıtýynsha, shilde aıynda Qytaıǵa soqqy bergen «Bavı» taıfýnymen salystyrǵanda, «Dolfın» kúshtirek jel men mol jaýyn-shashyn ákelýi yqtımal.
Maman tabıǵı apattyń yqpalyna túsýi múmkin Shyǵys Qytaı men eldiń basqa óńirlerinde taıfýn saldaryn joıýǵa daıyndyqty birinshi kezekke qoıyp, qatty jel, nóser jáne qaıtalama tabıǵı apattarǵa qarsy aldyn alý sharalaryn qabyldaý qajettigin atap ótti.
Sonymen qatar juma kúni Qytaıdyń Sý tasqyny men qurǵaqshylyqqa qarsy kúres jónindegi memlekettik bas shtaby Chjetszıan jáne Fýtszıan provıntsııalaryndaǵy sý tasqynyna baılanysty tótenshe áreket etý deńgeıin tórtinshiden úshinshige kóterdi.
Sol kúni ortalyq úkimettiń birneshe vedomstvosy men óńirlik bılik organdary ókilderiniń qatysýymen birlesken keńes ótti. Onda jaǵdaıdyń eń kúrdeli stsenarııine jan-jaqty daıyndalý, qaýipti aımaqtardaǵy turǵyndardy evakýatsııalaý jáne ózender men kólderdegi sý tasqynyna qarsy sharalardy kúsheıtý tapsyryldy, dep habarlady Qytaıdyń Tótenshe jaǵdaılardy basqarý mınıstrligi.
Mınıstrliktiń boljamynsha, «Dolfın» taıfýny eldiń shyǵys, ortalyq jáne soltústik óńirlerine asa qatty jaýyn-shashyn ákelýi múmkin. Bul taýly aımaqtarda sel júrý, geologııalyq apattar, shaǵyn jáne orta ózenderdiń tasýy, sondaı-aq qalalardy sý basý qaýpin arttyrady.
Aıta keteıik, Qytaıda sý tasqynyna qarsy tótenshe áreket etýdiń tórt deńgeıli júıesi qoldanylady. Onyń ishinde birinshi deńgeı – eń joǵary qaýip deńgeıi.
Eske sala ketsek, buǵan deıin Qytaıda «Dolfın» taıfýnyna baılanysty tabıǵı apat qaýpi kúsheıgenin jazdyq.
