Qytaı depýtattary Qazaqstanda júrgizilip jatqan reformalardy oń baǵalady
ASTANA. KAZINFORM – Májilis spıkeri Erlan Qoshanov Búkilqytaılyq halyq ókilderi jınalysy Turaqty komıteti tóraǵasynyń orynbasary Hao Mıntszınmen kezdesti. Taraptar elder arasyndaǵy parlamentaralyq, ekonomıkalyq jáne mádenı-gýmanıtarlyq yntymaqtastyqty damytý perspektıvalaryn talqylady.
Qytaı Halyq Respýblıkasy Búkilqytaılyq halyq ókilderi jınalysynyń delegatsııasymen kezdesýde Erlan Qoshanov álemdegi kúrdeli jaǵdaıǵa qaramastan, Qazaqstan men Qytaı senimdi seriktes ári tatý kórshi bolyp qala beretinin atap ótti.
– Qytaımen yntymaqtastyqty damytý – Qazaqstannyń syrtqy saıasatyndaǵy basym baǵyttyń biri. Bıyl Qazaqstan men Qytaı arasynda dıplomatııalyq qarym-qatynas ornaǵanyna 32 jyl toldy. Osy jyldar ishinde ekijaqty yntymaqtastyǵymyz eń joǵary – máńgilik jan-jaqty strategııalyq seriktestik deńgeıine kóterildi. Bul – birinshi kezekte, memleketterimizdiń basshylary eńbeginiń nátıjesi, - dedi Májilis tóraǵasy.
Erlan Qoshanov qytaılyq áriptesterine «Kúshti Prezıdent – yqpaldy Parlament – esep beretin Úkimet» formýlasyna sáıkes bıliktiń barlyq tarmaqtaryn jańartýǵa jol ashqan eldegi aýqymdy reformalar týraly aıtyp berdi. Spıker Palata jumysynyń josparlarymen bólisip, alty fraktsııa men bir mandatty depýtattardyń qatysýy zańnamalyq talqylaýlardyń sapasyna oń áser etkenine nazar aýdardy.
Óz kezeginde Hao Mıntszın Qytaı men Qazaqstannyń jaqyn kórshi ǵana emes, senimdi seriktes ári shynaıy dos ekenine toqtaldy.
– Meniń jáne bizdiń delegatsııa músheleriniń kópshiligi úshin bul –Qazaqstanǵa alǵashqy sapar. Aıta ketý kerek, Prezıdent Qasym-Jomart Toqaevtyń basshylyǵymen elderińizde qarqyndy ekonomıkalyq damý jáne áleýmettik turaqtylyq pen birliktiń joǵary deńgeıi baıqalady. Sizderdiń bastamalaryńyz barlyq salada júıeli túrde alǵa jyljyp keledi. Munyń bári bizge erekshe áser qaldyrdy, - dedi Búkilqytaılyq halyq ókilderi jınalysy Turaqty komıteti tóraǵasynyń orynbasary.
Hao Mıntszın «Bir beldeý – bir jol» bastamasy aıasyndaǵy yntymaqtastyqty joǵary baǵalap, 2023 jyldyń qorytyndysy boıynsha Qazaqstan men Qytaı arasyndaǵy ekijaqty taýar aınalymy rekordtyq mólsherge jetkenin aıtty.
Depýtattar parlamentaralyq dıplomatııa jelisi boıynsha jumysty kúsheıtý, komıtetter men dostyq toptary arasyndaǵy yntymaqtastyqty keńeıtý týraly ýaǵdalasty.
