Qytaı chıkýngýnıa vırýsyn juqtyrý qaýpi eń joǵary aımaqtar tizimin keńeıtti

ASTANA. KAZINFORM — Qytaı Halyq Respýblıkasynyń Aýrýlardyń aldyn alý jáne baqylaý jónindegi ulttyq basqarmasy chıkýngýnıa qyzbasyn juqtyrý qaýpi boıynsha aımaqtardyń jiktelýin jańartyp, eń joǵary qaýip tobyna taǵy birneshe óńirdi qosty, dep jazdy Kazinform tilshisi China Daily-ge silteme jasap.

Jańa usynymdarǵa sáıkes, eń joǵary qaýip sanatyna Chjetszıan, Fýtszıan, Gýandýn, Haınan, ıÝnnan provıntsııalary men Gýansı-Chjýan avtonomııalyq aýdany endi. Bul aımaqtarǵa Aedes tektes masalardyń uzaq ýaqyt boıy belsendi bolýy jáne buryn denge qyzbasynyń jergilikti juǵý jaǵdaılarynyń jıi tirkelýi tán.

Jańartylǵan baǵalaý birneshe aýrýdyń aldyn alý strategııasy aıasynda, vırýsty tasymaldaýshylardyń geografııalyq taralýy men maýsymdyq belsendiligi eskerile otyryp júrgizilgen. Qytaıdyń barlyq provıntsııalyq óńirleri men Shyńjań óndiristik-qurylys korpýsy qaýip deńgeıine qaraı tórt sanatqa bólingen.

Vedomstvo ókilderi epıdemıologııalyq jaǵdaıdyń ózgerýine baılanysty bul jikteý jańartylyp otyratynyn atap ótti. Qolaıly jaǵdaıda chıkýngýnıa vırýsy tez taralýy múmkin, sondyqtan jergilikti bılik epıdbaqylaýdy kúsheıtip, vırýstyń tasymaldaýshylarymen kúresti jandandyrýy qajet.

Eske salsaq, chıkýngýnıa qyzbasy — Aedes masalary arqyly taralatyn ótkir vırýstyq aýrý. Onyń belgilerine joǵary qyzý, teri bórtpesi jáne býyndardaǵy qatty aýrý jatady. Klınıkalyq kórinisi jaǵynan denge qyzbasyna uqsas. Bılik málimetinshe, Qytaıdyń ońtústik óńirlerinde bıyldyń ózinde 7 myńnan astam jaǵdaı tirkelgen.

Buǵan deıin Ońtústik Qytaıdaǵy Gýandýn provıntsııasynyń Foshan qalasynda chıkýngýnıa bezgegimen syrqattanýdyń jańa jaǵdaılarynyń sany birqatar aldyn alý sharalarynyń arqasynda azaıǵanyn jazǵan edik.