Qytaı búkil el boıynsha eSIM telefon qyzmetin iske qosty

ASTANA.KAZINFORM — Qytaıdyń iri telekommýnıkatsııalyq kompanııalary búkil el boıynsha elektrondy SIM-karta (eSIM) qyzmetin usynýǵa ruqsat aldy, dep habarlaıdy Sınhýa. 

Úsh jetekshi baılanys operatorlary — China Telecom, China Mobile jáne China Unicom bul qyzmetti resmı túrde iske qosty. Alaıda, abonentterge eSIM qyzmetin qosý úshin áli de operator keńsesine barý qajet bolady.

China Mobile eSIM tehnologııasy smartfondardy ǵana emes, sonymen qatar smart-saǵattardy, planshetterdi jáne avtokólikterge endirilgen qurylǵylardy qosa alǵanda, búkil ónim jelisinde qoljetimdi bolatynyn habarlady.

Osy aptanyń basynda Apple kompanııasynyń bas dırektory Tım Kýk Qytaıdyń Douyin qysqa beıne platformasynda resmı Apple Store tikeleı efırinde kútpegen jerden shyqty, onda ol Qytaıda tek eSIM tehnologııasymen jumys isteıtin iPhone Air smartfondarynyń shyǵarylatynyn jarııalady.

Onyń aıtýynsha, qurylǵyǵa aldyn ala tapsyrys 17 qazanda bastalady. iPhone Air Qytaıdaǵy eSIM tehnologııasyn paıdalanatyn operatorlar qoldaıtyn jalǵyz model bolady.

eSIM tehnologııasy dástúrli SIM kartasynyń barlyq múmkindigin telefonnyń kiristirilgen chıpine biriktirip, paıdalanýshylarǵa fızıkalyq kartany salmaı-aq daýystyq qońyraýlar shalýǵa, uıaly derekterdi paıdalanýǵa jáne mátindik habarlar jiberýge múmkindik beredi.

Buǵan deıin Qytaı qalalary DeepSeek kómegimen aqyldy qalany basqarýǵa kóshkenin habarlaǵan edik.