Qytaı býddısteri ókili: Dinder arasyndaǵy tatýlyq — beıbitshilikke bastar jol
ASTANA. KAZINFORM — Astanada Álemdik jáne dástúrli dinder lıderleri sezi Hatshylyǵynyń jıyrma úshinshi otyrysy ótti. Jıyn barysynda Qytaı býddıster qaýymdastyǵy tóraǵasynyń orynbasary, Qytaıdyń áıgili din qaıratkeri Tszın Bo sóz sóıledi.
Tszın Bo óz sózinde eń aldymen uıymdastyrýshylarǵa alǵys bildirip, barlyq áriptesi men qonaqtaryna ystyq sálemin joldady. Onyń aıtýynsha, Qazaqstan ejelden Shyǵys pen Batystyń toǵysqan mekeni ári Uly Jibek jolynyń mańyzdy toraby bolyp kelgen. Búgingi tańda da Qazaqstan kóp órkenıetti toǵystyrǵan biregeı qundylyqtardy pash etip, «Bir beldeý, bir jol» bastamasy aıasynda mádenı baılanystyń mańyzdy alańyna aınalyp otyr.
— Álemdik dinderdiń túpki murat-maqsattary ortaq — ol adamzatty qorǵaý jáne beıbitshilikti dáripteý, — dedi Tszın Bo.
Ol óz sózinde býddızmniń «sebep pen sharttyń toǵysýy» qaǵıdatyn eske salyp, sonymen qatar hrıstıan dininiń «ózgeni ózińdeı súıý», ıslamdaǵy meıirim men keshirim, daosızmdegi «tabıǵatpen úılesim» qaǵıdattaryn atap ótti. Bulardyń barlyǵy, onyń aıtýynsha, dinder arasyndaǵy únqatysý men yntymaqtastyqtyń berik negizin qalaıdy. Sonymen birge ol sezdiń jahandyq deńgeıde oı-pikir almasýdyń minberi bolyp otyrǵanyn atap ótti.
— Biz munda tájirıbe men yqylasty ortaǵa salyp jınaldyq. Bul dıalog ıdeıalardyń toǵysýyna ǵana emes, damý men beıbitshilikke baǵyttalǵan naqty qadamdarǵa jol ashady, — dedi Tszın Bo.
Ol bolashaqtaǵy yntymaqtastyqty sóz ete kele, dinder arasyndaǵy dıalogty «tatýlyq rýhynda» tereńdetý qajettigin aıtty. Sondaı-aq din lıderleriniń turaqty kezdesý tetigin qalyptastyrýdy, jastardyń qundylyqtaryn qalyptastyrý men otbasy qundylyqtaryn nyǵaıtý máselelerin talqylaýdy usyndy. Onyń aıtýynsha, dinı mádenıet pen dástúrli qundylyqtar qoǵam ómirine etene enip, áleýmettik qaıshylyqtardy sheshýge, jahandyq syn-qaterlerdi eńserýge kómektesýi tıis.
— Jahandyq jylyný, asharshylyq, qaqtyǵystar sııaqty memleketter men senimderden joǵary turǵan máselelerde din ókilderi izgi oı men ıgi isterdi naqty áreketke aınaldyrýy kerek. Jastardy senim men rýhanııat arqyly tárbıelep, beıbitshilik isin jalǵastyrý — barshamyzdyń ortaq mindetimiz, — dedi ol.
Sóziniń sońynda Tszın Bo segizinshi sezdiń tabysty ótýine tilektestik bildirip, Qytaı býddısteri álemdik din ókilderimen qol ustasa otyryp, beıbit ári baqytty bolashaq qurý jolynda kúsh biriktirýge daıyn ekenin atap ótti.
Belgili bolǵandaı, 2025 jylǵy 17–18 qyrkúıekte Astanada Álemdik jáne dástúrli dinder lıderleriniń segizinshi sezi ótedi. Forýmǵa álemniń túkpir-túkpirinen dinı jáne qoǵam qaıratkerleri qatyspaq.
Budan buryn Ońtústik Koreıa Álemdik jáne dástúrli dinder lıderleriniń VIII Sezine qatysatynyn jetkizgen edi.