Qytaı Brazılııanyń sıyr etine 55% qosymsha baj engizedi
ASTANA. KAZINFORM — 1 qazannan bastap Qytaı Brazılııadan ımporttalatyn sıyr etine qosymsha 55% baj salyǵyn engizedi, dep habarlady Lianhe Zaobao.
Qytaı Saýda mınıstrliginiń málimetinshe, sıyr eti ımportyna qatysty qorǵaý sharalary aıasynda Brazılııaǵa belgilengen ımport kólemi 29 qyrkúıekte 100%-ǵa jetken.
Qytaı Saýda mınıstrliginiń 2025 jylǵy № 87 habarlamasyna sáıkes, belgili bir elden ımporttalatyn sıyr eti belgilengen kvotanyń 100%-yna jetkennen keıingi úshinshi kúnnen bastap qosymsha kedendik baj qoldanylady.
Osyǵan baılanysty 1 qazan saǵat 00:00–den bastap Brazılııadan Qytaıǵa jetkiziletin sıyr etine qoldanystaǵy tarıfke qosymsha 55% baj salyǵy salynady.
Qytaı bıyl otandyq mal sharýashylyǵy óndirýshilerin qorǵaý maqsatynda ımporttyq sıyr etine kvota engizgen. 2026 jylǵa arnalǵan jalpy ımporttyq kvota 2,688 mln tonnany quraıdy.
Onyń ishinde Brazılııaǵa 1,106 mln tonna, Argentınaǵa 511 myń tonna, Aýstralııaǵa 205 myń tonna jáne AQSh-qa 164 myń tonna kóleminde kvota belgilengen.
Buǵan deıin Bloomberg Brazılııanyń et eksporttaýshy ónerkásip qaýymdastyǵyna silteme jasap, Qytaı naryǵyna jetkizilimderdiń shektelýine baılanysty buǵan deıin osy elge baǵyttalǵan Brazılııa sıyr etin basqa naryqtarǵa ótkizý qıyndaı túskenin habarlaǵan.
Atalǵan jaǵdaıdyń áseri mal ósirý men et óńdeýden bastap, saqtaý jáne logıstıkaǵa deıingi búkil óndiristik tizbekke taralyp otyrǵany aıtylǵan.
Aıta keteıik, Qytaı 2026 jylǵy 1 qańtardan bastap ımporttyq sıyr etine qatysty qorǵaý sharalaryn engizip, ár el úshin jeke ımporttyq kvota belgiledi. Kvota kólemi tolyq paıdalanylǵan jaǵdaıda, tıisti elden ákelinetin sıyr etine qosymsha baj salyǵy qoldanylady.
