Qytaı «Bir beldeý, bir jol» bastamasyna Panamanyń qatysýdan bas tartýyna jaýap berdi

Juma kúni Qytaı Syrtqy ister mınıstrliginiń resmı ókili Lın Tszıan Panamanyń «Bir beldeý, bir jol» bastamasyna qatysýdy toqtatady degen aqparatyna jaýap retinde málimdeme jasady, dep habarlaıdy Sınhýa agenttigi.

Lın Tszıan baspasóz máslıhatynda Qytaı AQSh-tyń bul áreketine úzildi-kesildi qarsy ekenin jáne Panamanyń Qytaımen «Bir beldeý, bir jol» yntymaqtastyǵy týraly memorandýmdy jańartpaıtynyna qatty ókinetinin aıtty.

Qytaı Syrtqy ister mınıstrligi ókiliniń sózinshe, «Bir beldeý, bir jol» bastamasy 150-den astam eldiń, sonyń ishinde 20-dan astam Latyn Amerıkasy elderiniń halqyna naqty paıda ákelgen ekonomıkalyq yntymaqtastyq bastamasy. Qytaı men Panama arasyndaǵy «Bir beldeý, bir jol» yntymaqtastyǵy sońǵy jyldary jemisti nátıjeler berdi.

«Qytaı Panamanyń syrtqy aralasýdy joıyp, ekijaqty qarym-qatynastardyń jalpy jaǵdaıyna jáne eki halyqtyń uzaq merzimdi múddelerine negizdelgen durys sheshim qabyldaýyna úmittenedi», - dedi ol.

Qytaı Panamanyń Panama kanalyndaǵy egemendigin qoldaıdy jáne onyń máńgi beıtarap halyqaralyq sý joly retinde mártebesin saqtaýǵa mindettenedi, dep málimdedi Qytaı Syrtqy ister mınıstrliginiń ókili.

Eske salaıyq, Panama prezıdenti Hose Raýl Mýlıno AQSh memlekettik hatshysy Marko Rýbıomen kelissózderden keıin el úkimeti Qytaımen «Bir beldeý, bir jol» bastamasy boıynsha ózara túsinistik týraly memorandýmdy jańartpaıtynyn aıtqan.

Buǵan deıin Memlekettik hatshy Marko Rýbıonyń Panamaǵa, sondaı-aq Gvatemala, Salvador, Kosta-Rıka jáne Domınıkan Respýblıkasyna baratyny habarlanǵan bolatyn.