Qytaı bıligi sý tasqynynan zardap shekken Gýıchjoý provıntsııasyna 100 mln ıýan bóldi

ASTANA. KAZINFORM — Qytaıdyń Memlekettik damý jáne reformalar komıteti sársenbi kúni Gýıchjoý provıntsııasynda tabıǵı apattardyń zardaptaryn joıýǵa kómek retinde 100 mln ıýan (shamamen 13,95 mln AQSh dollary) bólinetinin habarlady, dep jazady Sınhýa.

Gýıchjoý provıntsııasynda bolǵan joıqyn sý tasqynyna baılanysty Qytaıdyń Tabıǵı apattardyń aldyn alý, zardaptaryn azaıtý jáne zardap shekkenderge kómek kórsetý jónindegi memlekettik komıteti seısenbi kúni tórtinshi deńgeıdegi tótenshe áreket etý rejımin engizdi.

Memlekettik damý jáne reformalar komıteti málimetinshe, bólingen qarjy provıntsııadaǵy mańyzdy ınfraqurylym men qoǵamdyq qyzmetterdi qalpyna keltirýge jumsalady. Atap aıtqanda, joldar, sý tasqynyna qarsy júıeler, medıtsına mekemeleri men bilim berý uıymdary qalpyna keltiriledi.

Sonymen qatar, vedomstvonyń habarlaýynsha, óndiristik jáne turmystyq jaǵdaıdy múmkindiginshe tez qalypqa keltirý úshin Gýandýn (Ońtústik Qytaı) jáne Hýnan (Ortalyq Qytaı) provıntsııalaryna qosymsha 100 mln ıýan bólingen.

Eske sala keteıik, Qytaıda sý tasqynyna baılanysty tótenshe jaǵdaılarǵa áreket etýdiń tórt deńgeıli júıesi qoldanylady, munda 1-deńgeı — eń joǵarysy bolyp sanalady.

Budan buryn habarlanǵandaı, Qytaıdyń ońtústik-batysyndaǵy Gýıchjoý provıntsııasynda bolǵan kúshti sý tasqyny saldarynan 80 myńnan astam adam evakýatsııalandy.

Keshe Gýıchjoý provıntsııasynda tasjol kópiri qulap, júk kóliginiń júrgizýshisi qıraǵan kópirde ilýli turǵan kólik kabınasynda qalyp qoıǵanyn habarlaǵan edik.